La moza acusada de golpiar a Álvarez Areces en L'Humedal acepta una pena de dos años pa evitar la cárcel

“Equí hai una inxusticia permanente y un acosu y derribu, nesti Estáu, nesti país y nesta Sala, sobre manera”, espresó nel actu de conformidá la moza acusada de golpiar nel 2010 a Vicente Álvarez Areces. Aceptó una pena de dos años.
 
La vista oral, señalada ayeri, a les 10.30 hores, na Estaya Octava de l'Audiencia Provincial, con sede en Xixón, nun se llegó a celebrar. V.S.T. viose obligada a aceptar una pena de dos años, una multa de 360 euros y una indemnización de 300 euros al d’aquella presidente del país pese a que nun sufrió mancadura nenguna. D’esta forma, evitaba entrar na cárcel al nun tener antecedentes penales. Xunto a la moza acusada xulgábase tamién a la so madre, C.H.T.F., qu'aceptó una multa de 90 euros por tratar de torgar la detención de la so fía mordiendo supuestamente na mano a un axente del Cuerpo Nacional de Policía, y el pagu d'una indemnización de 30 euros al axente.
 
Nel actu de conformidá, que foi n'audiencia pública, V.S.T., nel so derechu a unes pallabres caberes, criticó'l procesu siguíu contra ella y la so madre. "Equí hai una inxusticia permanente y un acosu y derribu, nesti Estáu, nesti país y nesta Sala, sobre manera", indicó, mentes que la so proxenitora llendóse a indicar que "Garzón tenía razón". Pela so parte, l'abogada de les acusaes, Xulia Fernández, tresmitió, en nome de los sos clientes, que se sienten "maltrataes pol sistema" y que nun deseen salir a la lluz pública. Precisó que nenguna de los dos tien antecedentes nin tuvieren "nunca" problemes cola Xusticia.
 
Añadió que la moza niega los fechos, pero qu'aceptó l'acuerdu de conformidá pa evitar entrar en prisión, dao que con dos años de pidimientu de condena y ensin antecedentes, nun va tener que dir a la cárcel. Dambes muyeres, mientres l'actu en sesión pública, tapeciéronse pa evitar que les fotografiaren con un papel nel que podía lleese 'Prensa manipuladora'. Nel esterior del Xulgáu, mentanto, delles decenes de persones concentráronse n'apoyu a les procesaes. L’organismu antirrepresivu Sofitu ye ún de los coleutivos que tán trabayando enforma pa visibilizar esta inxusticia y p’ayudar económicamente a les dos muyeres nel pagu de les multes.
 
La Fiscalía d'Área de Xixón solicitaba de primeres una condena de cuatro años de prisión y el pagu d'una multa de 1.920 euros pa l'acusada. El Ministeriu Públicu caltién que, sobre les 16.20 hores del 9 de xunetu del 2010, por cuenta de la celebración de la XXIII Semana Negra de Xixón, llegó'l Tren Negru a la estación de la Plaza de L’Humedal, nel que viaxaba, ente otros, Álvarez Areces nel exerciciu de les funciones propies del so cargu. Con caráuter previu, estableciérase nel llugar un gordón de seguridá, dao que se concentraren munchos trabayadores en protesta pola so situación llaboral. Ente elles alcontrábase l'acusada V.S.T., que, amás d'increpar a Álvarez Areces, dio-y un manotada na cabeza, ensin llegar a causa-y lesión dalguna.
 
Nel cursu de la detención, y mientres conducíen a l'acusada al vehículu policial, la so madre, C.H.T.F., pa tratar de torgar la detención de la so fía, y según la versión de l'acusación, llegó a morder na mano a un axente del Cuerpu Nacional de Policía, ensin que tuviera nengún día impidíu pa les sos ocupaciones habituales. Nun-y quedaron secueles.
 
Una cayida provoca a Álvarez Areces una fractura nel brazu
 
L’agora senador, Álvarez Areces, cayó al suelu de forma accidental el vienres pasáu, fracturándose l’húmeru. Fontes socialistes señalaron que l’ex presidente del país ta recuperándose de la lesión con normalidá.