La mitoloxía, a debate na Arribada

L'Arribada, el certame qu'estos díes axunta en Xixón a los creadores de literatura n'asturianu y al so públicu llector, entama esti vienres 21 de setiembre cola presentación a les16:30 hores del llibru infantil "Lías", de Xuan Carlos Crespos Lanchas, con dibuxos de Rocío Pinín. Darréu va celebrase una ponencia del dibuxante y etnógrafu Alberto Álvarez Peña, que va falar dende les 17:00 hores, tamién nel Centru de Cultura Antiguu Institutu onde se desarrollen toles actividaes del certame, de "la mitoloxía" un tema sobre'l que va celebrase una mesa redonda col mesmu Álvarez Peña, Xosé Nel Caldevilla, Vicente García Oliva, Esther Prieto y Urbano Rodríguez.

A les 18:30 va facese públicu'l ganador del "Premiu Timón" que la organización de l'Arribada concede en reconocimientu a una carrera lliteraria y, a les 19:00 hores, la escritora Aurora García Rivas va presentar el recital "Con espluma de mar y vieyos minerales" nel que van participar. Sara Fernández Suárez, Lluis Antón González y Aida Rivas, que van recitar poemes de Fredo de Carbexe, Luis Fernández Roces, Aurelio G. Ovies, Juan Carlos Gea, Humberto Gonzali, Taresa Llorences, Nené Losada, Esther Prieto y Xosé Miguel Suárez. El grupu Senogul va echar el piesllu musical a la tarde.