La minería del carbón vive la tercer xornada de paru tres nun haber alcuerdu na reunión de la Comisión

|

La reunión de la Comisión del Siguimientu del Carbón terminó ensin alcuerdu nengún, polo que los sindicatos mantienen les dos xornaes de fuelga nel sector. Pese a nun haber paru’l martes, entamáronse cortes de carreteres n’Asturies.
 
Al traviés d’un comunicáu, la Federación d’Industria de CC OO calificó l’alcuentru d’ayeri de "decepcionante y ensin conteníu" y vaticina "una folada de crispación nes cais" dau "el descontentu y les duldes esistentes nes zones mineres". Asina, CO OO y UXT mantienen les dos xornaes de paru previstes pa güei y mañana a les que tán llamaos más de 8.000 mineros. "Nuna reunión que se presumía podía enteabrir les puertes a la situación difícil que se prevé pal sector, agora la negativa del Executivu de Rajoy a dotar con una partida presupuestaria suficiente pal mantenimiento de l’actividá dexa poques alternatives a les zones mineres", reprochen dende’l sindicatu.
 
El siguimientu de la fuelga, al igual que la selmana pasada, ta siendo total en tol sector a nivel estatal. N’Asturies hubo dellos cortes de carreteres esta mañana, en Muros y en Campumanes. Tamién nel Güerna na so parte lleonesa. Hai que destacar qu’ayeri los trabayadores llevantaron barricaes, mañana y tarde, en dellos puntos del país de manera sorpresiva y ensin tener en cuenta a los sindicatos. Otra manera, nos pozos Candín y Santiago mantiénense enzarraos cinco mineros dende’l llunes como protesta ante los recortes previstos al carbón pol Gobiernu estatal

Contador Estadistiques