La militancia de Podemos Asturies confirma a Ripa na secretaría xeneral

Daniel Ripa resultó reescoyíu como secretariu xeneral de Podemos Asturies tres algamar un 62,46 por cientu de los votos nel procesu de primaries del partíu. Héctor Piernavieja, consiguió un 24,30 por cientu, mentes que Vanessa Llaneza rexistró un 13,25 por cientu.

La III Asamblea Ciudadana pa la renovación de los órganos de Podemos contó cola participación de más d’un terciu de los inscritos activos, lo que dende’l partíu destaquen como la más alta nun procesu territorial de la formación en tol Estáu, que cuenta con una media del 26 por cientu. Dende’l sábadu hasta’l meudía del miércoles, presencial o telemáticamente, votaron 3.178 persones d’un total de 16.608 inscrites y 8.747 actives a fecha de 28 de payares, lo que supón un 36,33 por cientu d’inscrites actives.

Éstes confirmaron a Ripa al frente de la secretaría xeneral con un total de 1.943 votos, 1.119 más que’l diputáu Piernavieja (752) y 1.533 que la ex edil de Llangréu Llaneza (410). D’igual forma, l’equipu Asturies 2019, que lideraba Ripa, algamó 29 puestos nel Conseyu Ciudadanu, por 3 de Dende Abaxo y 2 d’Ágora Asturies.

Les cinco persones que más apoyos algamaron nesti procesu foron Nuria Rodríguez López, Jara Cosculluela, Lluis Miguel Orviz, Emilio León y Andrés Fernández Vilanova ‘Ron’. Xuacu Rodríguez Morón, responsable d’organización de Podemos Asturies, destacó tres valorar la participación, “que la xente n’Asturies ta movilizao, que tenemos una organización con bona salú y qu’a la xente-y importa’l futuru de Podemos n’Asturies”.