La militancia d’Izquierda Xunida refuga formar parte del Gobiernu

El PSOE va gobernar en solitariu n’Asturies tres la decisión de la militancia d’Izquierda Xunida de nun entrar nel Executivu. Los socialistes teníen previsto ceder a la coalición les conseyeríes de Bienestar Social y Vivienda, y Agroganadería.
 
El diputado d’IX nel Congresu, Gaspar Llamazares, avanzó na so cuenta de Twitter que la militancia n’Asturies decidió nun entrar a formar parte del Executivu asturianu y fontes de la coalición aseguraron a Europa Press que previsiblemente, y salvo un vuelcu inesperáu, la militancia refugara formar parte del Gobiernu de Javier Fernández. En concreto, el tweet de Llamazares dicía lo siguiente: “Parece que la militancia de IU de Asturias opta por acuerdos parlamentarios, y no por el pacto de gobierno. Democracia”.
 
El coordinador xeneral de la coalición nel país, Jesús Iglesias, pidiera güei a los sos militantes qu’apoyaren la entrada nun Gobiernu de coalición cola FSA-PSOE que-yos permitiera "dar estabilidá" y "condicionar" les polítiques del Executivu. Les dos organizaciones llegaren a un alcuerdu que daba a IX les conseyeríes de Bienestar Social y Vivienda, y Agroganadería, amás de la direición xeneral de Patrimoniu, dependiente de Facienda. Según los planes socialistes, l’Executivu nuevu va tar formáu por ocho conseyeríes, una menos qu’hasta’l momentu pola fusión d’Educación con Cultura y Deportes.