La Mesa de la Xunta Xeneral aprueba les cuentes de la Cámara cola astención de Foro y PP

Los representantes de PSOE, IX y UPyD na Mesa de la Xunta Xeneral aprobaron les cuentes del parllamentu asturianu, votación na que s’astuvieron Foro y PP. El presupuestu pal 2013 ye de 13.841.000 euros, un 8,62 por cientu menos qu'esti añu.

Los componentes de la Mesa son el presidente, Pedro Sanjurjo (PSOE); el vicepresidente primeru, Pelayo Roces (Foro); el vicepresidente segundu, José Agustín Cuervas-Mons (PP), el secretariu primeru, Aurelio Martín (IX); y el secretariu segundu, Ignacio Prendes Prendes (UPyD). Por capítulos, el presupuestu divídese en 8,8 millones pa gastos de personal; 1,8 millones pa gastos en bienes corrientes y servicios; 2,9 millones pa tresferencies corrientes; 161.000 euros pa inversiones reales; y 50.000 euros d’activos financieros.

Sanjurjo señaló que l’asignación a los 45 diputados y a los grupos parllamentarios nun varíen respeuto a lo alcordao a comienzos de esta novena llexislatura. Nel 2013 destínase una partida de 2.351.000 euros a asignaciones de diputaos, inferior a la de los 2.435.000 euros que figuraba nes cuentes vixentes, lo que supón una baxada de 84.000 euros, un 3,45 por cientu menos. Les tresferencies a los grupos parllamentarios redúcense en 120.252 euros respeuto a los presupuestos del 2011 prorrogaos esti añu, lo que supón un 4,13 por cientu.

El presidente de la Xunta Xeneral comentó que la ellaboración del presupuestu axustóse a los principios de "austeridá máxima, racionalidá y contención del gastu", col oxetivu de cumplir les esixencies d’estabilidá económica y financiera. Asina, anunció planes y midíes pa conseguir una racionalidá mayor nel gastu, como un Plan de Meyora de la Eficiencia que recueya un códigu de práutiques bones nel usu de recursos, y un Plan de Sistemes d’Información y Modernización, incluyendo la meyora de la páxina web de la institución.  Amás, recordó que nel 2013 la Cámara celebra’l 30 aniversariu de les primeres eleiciones a la Xunta Xeneral, celebraes el 8 de mayu del 1983.