La mayor parte d'Asturies caltién l'alerta naranxa por nevaes

|
Asturies alerta naranxa 1 d'avientu

Namái ta llibre de nieve la mariña. Son obligatories les cadenes en 14 puertos, con Payares zarráu al pasu de camiones.

Entró avientu como coló payares, con nevaes en gran parte del país y munchu fríu. L'Axencia Estatal de Meteoroloxía (Aemete) decreta pa güei alerta naranxa, esto ye, riesgu importante en toda Asturies, a esceición de la mariña, por nieve.

Mañana l'avisu va descender a mariella, esto ye, riesgu, y va ser namái pa la zona centru y este del cordal, mentes que pal domingu s'espera la vuelta a la normalidá nel país, con alerta mariella namái pa la zona de Lleón. Van descender les temperatures mínimes estos díes siguientes, pero les máximes van xubir.

Una carretera piesllada

El Puertu Payares tien el so pasu zarráu, anque namái a vehículos pesaos. A les 15 hores les cadenes yeren obligaes n'otros 13 puertos de montaña: El Palu, Pozu las Muyeres Muertas, La Marta, San Isidro, Ḷḷeitariegos, El Counio, Tarna, Zarréu, Altu del Campieḷḷu, L’Acebu, La Cobertoria, Somiedu, San Ḷḷorienzu y Ventana.

Mentes, caltiénse piesllada la carretera la LN-8 nel tramu de Tuíza al puertu de La Cubieḷḷa, y ye necesariu usar cadenes n'otres cuatro, ente elles la que xubi a los Llagos. Pue consultar l’estáu de les carreteres asturianes al momentu calcando nesti enllaz.

Contador Estadistiques