La mariña occidental del país recibe'l Premiu Condé Nast Traveler

Al meyor destín turísticu dientro l'Estáu.

La undécima edición de los Premios Condé Nast Traveler n'España, qu'entrega esta revista de viaxes de luxu y estilu de vida nacida nos Estaos Xuníos, miró p'Asturies. Los sos llectores escoyeron la mariña del occidente del país como'l llugar más prestosu pa visitar.

Julio González Zapico, direutor xeneral de Comerciu y Turismu, acudió ayeri a Madrid a la gala d'entrega de gallardones, recibiendo'l premiu de manes del tamién asturianu Miguel Carrizo. Na so intervención, calificó la costa occidental como “un paraísu dientro del paraísu”, y convidó a los presentes a "descubrir les sos sableres tranquiles, con unos cantiles d'infartu dende'l cabu Vidíu o'l cabu Bustu, a pasiar poles villes de Castropol, Ḷḷuarca o Cuideiru, y a comer el meyor pescáu en Viavélez o Veiga".

Los Premios Condé Nast Traveler n'España tamién distinguieron establecimientos turísticos y marques d'estilu de vida. Como meyor destín internacional, gallardonó a Manchester.