La mar gallega afuégase en galipote

La costa gallega enfréntase al mayor desastre dende la catástrofe del petroleru Mar Egeo. Cuando la galerna de la otra selmana abrió una resquiebra nel cascu del petroleru Prestige, que carretaba más de 70.000 tonelaes de petróleu, xusto de la que pasaba enfrente de Galicia, entamaba una selmana tráxica pa la mar qu'entovía nun acabó y que puede dexar consecuencies pergraves pa Galicia y bien del Cantábricu.

Tres l'accidente cuatro remolcadores tan tirando pol barcu pa llevalu pela mar adientro y qu'asina nun siga soltando'l galipote que yá llegó a la costa gallega y que ta echando a perder la temporada de pesca, pero según denuncia la organización WWF-Adena, el camín que ta llevando'l barcu nun ye'l más conveniente. Según WWF-Adena, lo que traten ye llevar el barcu a un llugar que tenga fondura abondo pa echalu a pique, una igua que-yos abulta a los ecoloxistes entovía peor que l'accidente, porque si funden el barcu ellí lo que diben facer ye esfarraplar una zona que ta solicitao que la enxerten nel sistema de proteccion marina de la OSPAR.

Los ecoloxistes critiquen lo chapucero de la igua que quier facese y lo muncho que tardaron en llegar los pocos medios que se teníen p'atayar la marea negro que yá ta entafarrando de galipote 200 kmts de la costa gallega. Otramiente, reclamen que se tresvase'l petróleu del Prestige a otru barcu, solución que dicen que ye técnicamente posible y que entovía nun se plantegó. Ironíes de la mar, el Prestige tenía que dexar de navegar nel añu 2.005, cuando la normativa nueva que se fizo tres del desastre del Erika en Francia punxo pa esi añu la retirada obligatoria de tolos petroleros que nun tuvieren doble cascu, casu del Prestige, un barcu con capacidá pa 85.000 tonelaes costruyíu nel Xapón en 1.976

Mientres el Prestige ta yá a 100 milles de la costa, en zona de responsabilidá portuguesa, y el gobiernu nun declara zona catastrófica, la prensa espeya la guerra propagandística que ta faciéndose a cuenta del barcu, que se supón que diba camín de Xibraltar. Nel web de WorldPhotos hai un estoyu curiosu de semeyes del barcu y del galipote que ta llegando a la costa, y pue seguise la situación nel portal gallegu Vieiros.