La manifestación xunitaria d’Avilés pol 25-P va recordar que “ensin agresores nun hai víctimes”

|
Cartelu 25-P

Esti vienres, 25 de payares, conmemórase’l Día Internacional de Desaniciu de la Violencia contra la Muyer. Per toa Asturies celébrense actos pa poner el focu nesta problemática y ta convocada pela tarde por Asturies Feminista 8M una manifestación xunitaria n’Avilés baxo’l lema ‘Ensin agresores nun hai víctimes. Feminismu pa ser llibres’.

El 25 de payares vien entamándose dende'l 1981, xornada que recuerda l'asesinatu de trés hermanes, les Mirabal, activistes polítiques, en República Dominicana nel 1960 pol réxime de Trujillo. Una fecha que sirve pa rescamplar esti grave problema y pa concienciar a la sociedá sobre'l mesmu.

Munchos conceyos del país entamaron concentraciones al meudía o celebraron actos de diferente calter a lo llargo de la xornada, un día de reivindicación que va tener el so puntu central na manifestación d’Avilés, con salida prevista a les 19.30 hores na plaza de los Oficios y final n’El Parche. Según informa la organización, ésta va estructurase en trés bloques que llueu van confluyir na marcha hacia la Casa Conceyu: ‘Violencies’, muyeres “que combaten les violencies nel so día a día" (cai Llanoponte y cai El Muelle); ‘Esenciales’, “trabayadores necesaries y lluchadores” (avenida del Marqués Suárez); y ‘Interxeneracional’, “moces y pensionistes” (cai Llanoponte y L’Arbolón).

“El focu de la violencia machista ha cambiar de sentíu y nun centrase únicamente na revictimización de les muyeres. Tamos cansaes de llorar a les nueses hermanes y nun recibir respuestes. Los fíos sanos del patriarcáu siguen formándose nun sistema violentu y patriarcal, ye necesario lluchar como ciudadanía contra la violencia simbólica, económica y institucional pa que dexen de crecer les víctimes y d’educar a agresores”, espresen dende Asturies Feminista 8M pa esplicar el motivu del lema d’esti añu.

“‘Feminismu pa ser llibres’ porque dende él toles personas podemos combatir el terrorismu machista que reproduz la violencia nes nueses vides y encadénanos a cumplir con unos roles que nos faen dañu y condicionen les nueses vides”, añaden.

Contador Estadistiques