La manifestación pola oficialidá va afondar nel problema de la toponimia y na presencia del idioma na RTPA

|
La XDLA convoca un añu más, nel Día de les Lletres Asturianes, una manifestación pola oficialidá. Va ser el vienres, a les 19.30 hores con salida na Estación del Norte, y va afondar na problema de la toponimia y na presencia na RTPA.
 
Carlos Pulgar y María Xosé Martínez encargáronse d’esplicar tolos detalles de la convocatoria d’esti añu, que va siguir el percorríu tradicional dende la estación de RENFE hasta’l Teatru Campoamor, onde va celebrase, a les 20.30 hores, la xunta estraordinaria de l’Academia de la Llingua Asturiana. Nesta ocasión, la Xunta pola Defensa de la Llingua Asturiana (XDLA) quier calcar en dos problemátiques que considera importante salvar p’algamar una meyor visibilización del idioma, como ye’l cuplimientu de la llegalidá toponímica y la presencia na RTPA.
 
Nel primer puntu, los representantes del coleutivu cívicu señalaron qu’hai 28 conceyos que tovía nun aprobaron la so revisión de la toponimia, polo que demanden al Gobiernu a qu’entaíne’l procesu. D’igual forma, recordaron que la inmensa mayoría de los conceyos que yá oficializaron los sos nomes de llugar tradicional siguen utilizando les formes derogaes mientres l’Executivu mira pa otru llau. No que respeuta a la presencia nos medios públicos, situaron el porcentaxe d’emisión de programes n’asturianu nun “2 o 3 por cientu marginal” y llamaron a toles formaciones polítiques a tener en cuenta l’idioma nel apartáu correspondiente al ente de comunicación na futura Llei del Principaú d’Asturies de Segunda Reestructuración del Sector Públicu Autonómicu.
 
La XDLA tamién anunció la celebración güei nel Colexu Públicu Evaristo Valle, de Xixón, d’un actu conmemorativu de los 30 años de presencia de la llingua asturiana nel sistema educativu. Asina, al meudía va celebrase una mesa redonda cola presencia d’autoridaes, maestros antiguos, alumnos y representante del coleutivu cívicu, pa depués inaugurar un monolitu, momentu nel que va procedese a una llectura de poemes a cargu de los escolinos y a una actuación musical de Xurde y Eva López Álvarez, alumnos antiguos del centru. Por último, a les 13.30 hores, va plantase un árbol conmemorativu de la fecha.
 
Visibilidá del llibru n’asturianu
 
Otra llei que la XDLA considera importante pal asturianu ye la de Biblioteques, cola que’l Gobiernu pretende fomentar la llectura y definir el sistema bibliotecariu d'Asturies. Esta norma anuncióla Ana González nes celebraciones del Día del Llibru – xornada nel que’l nuesu idioma y la nuesa lliteratura foron otra vuelta escaecíes– al mesmu tiempu qu’animó a la sociedá a que lleeera. Agora, coincidiendo cola Selmana de les Lletres y del Día del Llibru y del Discu n’Asturianu, esti vienres, el coleutivu cívicu demanda a la conseyera que “faiga un llamáu asemeyáu y pida a la sociedá que fale y llea n’asturianu”, amás d’animar a tolos asturianos y asturianes cola so presencia en tolos actos institucionales convocaos pa estos díes.
 
D’igual forma, en rellación a la Llei de Biblioteques, esixe a l’Alministración pública “que tenga en cuenta que n’Asturies existe una realidá llingüística propia con una lliteratura importante, polo que la Llei de Biblioteques nueva tien que ser fundamental pa visibilizala”. Nesti puntu recuerda l’importante texíu empresarial y el númberu d’editoriales que nacieron gracies a la lliteratura n’asturianu, y considera que “ye’l momentu de que los xestores públicos aconceyen colos responsables d’estes empreses pa escuchar les sos necesidaes y pruyimientos. La mesma viceconseyera del Gobiernu español, Soraya Sáenz de Santamaria, viaxó de Madrid a Barcelona pa reunise col sector editorial en catalán esti 23 d’abril. Mentanto, el nuestru Executivu actuó como si’l mercáu del llibru n’asturianu –y los puestos de trabayu que xenera– nun existieren”.
 
Contador Estadistiques