La mancha, en directo

Dende va delles selmanes, una gran masa de galipote sigue amenazando la nuestra costa. Asitiada na vertical del Cabu Peñes, la gran mancha anda al debalu del aire y les corrientes, siempre a una distancia prudencial de la costa d'ente 60 y 90 milles. Agora los movimientos d'esa gran mancha podemos seguiles al través de la rede, onde esta páxina especial de la fundación Azti da, puntualmente, l'allugamientu de les boyes coles que ta estudiando la marea negra en tola costa cantábrica. Azti igual ye un nome desconocíu pal públicu asturianu, pero toa una referencia mundial en tema de mediu ambiente marín, tecnoloxía de los alimentos y dela pesca que funciona dende va más de venti años n'Euskadi baxo la forma xurídica d'una fundación participada pol Gobiernu vascu.