La macroencuesta del CIS da trés diputaos al PSOE y al PP, y ún a Izquierda Xunida y Foro

|

Según los datos del CIS, cuatro formaciones polítiques tendríen representación por Asturies nel Congresu: PSOE (3), PP (3), IX (1) y Foro (1). La presidencia del Gobiernu del Estáu sedría pal popular Mariano Rajoy por mayoría absoluta.
 
De confirmase los resultaos de la macroencuesta, un partíu asturianu tendría per primer vez representación en Madrid, anque Foro nun conseguiría’l so oxetivu de sumar cinco parllamentarios ente Asturies y la Comunidad de Madrid pa poder formar grupu propiu y debería tar nel grupu mestu. D’igual forma, Izquierda Xunida recuperaría’l so diputáu por Asturies tres dos llexislatures ensin representación. No que respeuta a los dos partíos mayoritarios, PSOE y PP, dambos perderíen un escañu en comparanza colos resultaos de les xenerales del 2008.
 
A nivel estatal, destacaría’l trunfu por mayoría absoluta del PP al sumar una estimación de votu del 46,60 por cientu, lo que daría al partíu de Mariano Rajoy ente 190 y 195 escaños, cifra superior a l’algamada nel añu 2000 por José María Aznar (183). Mentes, el PSOE conseguiría un 29,91 por cientu –el so peor datu en trenta años–, lo que-y reportaría ente 116 y 121 diputaos.
 
El restu de partíos con representación sedríen CiU (13), IX (8, con un 6,17 por ciento de los votos: Sevilla, Asturies, València, dos por Madrid y trés por Barcelona), PNV (3), Amaiur (3), ERC (3), UPyD (3, toos en Madrid, con un 2,91 por ciento de los votos), BNG (2), CC (2), Foro (1) y Compromís-Equo (1). Hai que destacar qu’esta macroencuesta fixóse enantes del comunicáu d’ETA nel qu’anunciaba’l cese de la llucha armada.

Contador Estadistiques