La música garra’l mandu nel xixonés Festival Arcu Atlánticu

Dende esti miércoles, la música va protagonizar les actividaes del Festival Arcu Atlánticu. Tejedor, Tuenda, Hevia –de pagu nel Xovellanos–, Felpeyu, Llan de Cubel o Paddy Keenan van actuar na Plaza Mayor o na sablera d’El Natahoyo.
 
Los avilesinos Tejedor van abrir los conciertos de baldre na Plaza Mayor esta nueche, a partir de les 22.30 hores. Xunto a los dos hermanos, van xubise al escenariu Miguel Herrero, Tino Cuesta y Toño Gómez, amás del duu de txalapartis vascos formáu por Iñaki Plaza y Kepa Calvo. Los aficionaos a la música irlandesa tienen a la mesma hora, na sablera d’El Natahoyo, una alternativa dientro de les munches actividaes programaes nel llugar pola Asociación Pelagius gracies a la presencia de la banda madrilana Boys of the Hills. Tres esta actuación, a la medianueche, va tomar el relevu Tuenda, pesllando asina una nueche musical na playa xixonesa qu’abrirá’l Coru de Cimavilla a les 20 hores.
 
L’escenariu de Noegapolis, como se fai llamar la pequeña ciudá qu’acueye les Xornaes de Náutica entamaes por Pelagius, va continuar con actividá’l xueves a partir de les 22.30 hores con un conciertu de Felpeyu, al que va siguir una actuación nueva de Boys of the Hills. Mentes, nel Teatru Xovellanos, tamién a les 22.30 hores, Hevia va ufrir un conciertu de pagu (12 euros xeneral; 15, entresuelu; y 18, butaca) nel que va tar acompañáu al pianu por Josué Santos y a la percusión por María José Hevia.
 
Los esperaos Llan de Cubel
 
El vienres llega la que quiciabes ye la cita más esperada del Festival Arcu Atlánticu polos aficionaos al folk del país, yá que va llevar la so música a la Plaza Mayor xixonesa Llan de Cubel. La banda torna d’esta manera a la ciudá pa ufrir un conciertu que va principiar a les 22.30 hores y nel que’l públicu tamién va poder sentir al gaiteru irlandés Paddy Keenan. Mentes, n’El Natahoyo, l’actividá musical va abrise a les 20.30 hores colos cantares marineros y habaneres de la Coral de Porceyo, pa continuar una hora y media más tarde con una actuación de la Banda de Gaites del Arcu Atlánticu y, alredor de les 23 hores, con otru conciertu de la banda madrilana de folk irlandés.
 
El certame, dedicáu nesta primer edición a Portugal, va ufrir a los xixoneses y visitantes conocer a los lusos Nação Vira Lata, banda que destaca pola so percusión, el sábadu na Plaza Mayor a partir de les 21 hores, eventu nel que tamién va tener llugar un alcuentru de bandes de gaites. Como alternativa, a les 22 hores, Paddy Keenan va repetir actuación, nesta ocasión en Noegapolis nuna nueche de nidio color verde, yá que, darréu, va continuar cola folixa Boys of the Hills. Pal domingu ta previsto’l pieslle oficial del Festival Arcu Atlánticu a les 13 hores na Plaza Mayor, llugar onde ta previsto un alcuentru nuevu de bandes de gaites del arcu atlánticu al meudía.
 
Na semeya, Llan de Cubel.