La música asturiana y la danza, protagonistes esta fin de selmana

El públicu aficionáu a la música asturiana y a la danza tradicional tien bien d’opciones pa escoyer esta fin de selmana. Xixón, Uviéu y Mieres acueyen charres, conciertos y actuaciones de bandes y agrupaciones reconocíes.

La ciudá que concentra más eventos estos díes ye Xixón, qu’esta tarde va ser sede del I Memorial Berto Velasco y de l’actuación de l'Asociación de Folclore Azabache y de la Compañía de Danza Proyecto Piloto, enmarcada dientro de los 'Encuentros de las Músicas Asturianas' qu’entama’l Conceyu de Xixón al traviés del proyeutu musical Distrito Música. La primer cita va tener llugar a les 19 hores nel salón d’actos del Centru Municipal Integráu Pumarín-Xixón Sur, con entrada llibre, y trátase d’un festival dedicáu a la memoria del artesanu Alberto Fernández Velasco nel que se va facer un repás a la música tradicional asturiana que tanto admiraba. Asina, sobre l’escenariu del centru del barriu xixonés van tar presentes la Banda Gaites Noega, la Banda Gaites Conceyu de Siero, l’Asturiana Mining Company, Mari Luz Cristobal , Marisa Valle Roso, Xuacu Amieva, Hugo Noval, Jorge Tuya, Luis Estrada, Simón San José, Xaime Arias, Juan José Martínez, Héctor Braga, Tino Cuesta y Berto Varillas, ente otros. El conciertu va ser grabáu pola TPA pa emitilu nel espaciu ‘Sones’.

Media hora más tarde, nel Centru Municipal Integráu Atenéu de La Calzada, la danza va ser protagonista cola actuación de l'Asociación de Folclore Azabache y de la Compañía de Danza Proyecto Piloto, un alcuentru ente’l baille tradicional y el contemporaneu, tamién con entrada llibre. Esta actuación va repetise’l martes, a la mesma hora, nel Centru Municipal Integráu d’El Llano.

Otra manera, la capital de la Costa Verde va acoyer mañana los V Alcuentros cola Cultura Tradicional qu’entama Vezos Astures, col grupu zamoranu Bajo Duero como convidáu. El Centru de Cultura Antiguu Institutu va ser sede, a partir de les 11 hores, de delles charres sobre’l ciclu festivu en Zamora y les percusiones na fastera occidental de la provincia. Yá pela tarde, a partir de les 17 hores, Bajo Duero va ufrir un par de talleres de baille tradicional zamoranu nel Colexu Públicu Xovellanos, mentes que Vezos Astures va dar otru de baille asturianu. Toles actividaes son de baldre. Por último, los participantes van celebrar una espicha nel Llagar Herminio, en Cualloto, pa lo que ye necesario confirmar asistencia.

Festival de Xácara y conciertu solidariu con África

Tamién mañana, nesti casu n’Uviéu, va tener llugar el X Festival de Música Tradicional Xácara, entamada pola banda de gaites uviedina, cola participación de dellos gaiteros destacaos, como l’escocés Fred Morrison, Berto Varillas, Flavio R. Benito, Gustavo Eguren, José Manuel Fernández ‘Guti’, José Manuel Tejedor, Pedro Pangua, Santi Caleya, Vicente Prado ‘El Pravianu’ y Xuacu Amieva. L’eventu va principiar a les 19.30 hores nel Auditoriu d’Uviéu y tien entrada llibre.

Completa les actividaes musicales d’esta fin de selmana la II Gala Solidaria Asturies por África, presentada pola actriz María Cotiello y por Joaquín Pajarón, que va celebrase mañana, a partir de les 20 hores, na Casa de Cultura de Mieres. El públicu presente va poder ver sobre l’escenariu a Los Berrones, Skanda, Belo, el Coro Minero de Turón, la Banda de Gaites El Trasno y a los actores del programa ‘El Chigre’ de la TPA. Les perres recaudaes –la entrada ye la voluntá– van destinase a los proyeutos que tien la ONG Asturies por África en Gambia.