La música asturiana va recordar a Igor y Carlos con conciertos en dellos llocales y mensaxes reivindicativos

Esta selmana cúmplense siete años de la muerte d’Igor Medio y Carlos Redondo, pero la música asturiana nun escaez la figura d’estos dos artistes. Los díes 28 y 29 van celebrase venti actuaciones d'homenaxe en Xixón ente reivindicaciones.

‘N’Alcordanza d’Igor y Carlos 2013’, polo tanto, va dividise en dos xornaes con conciertos de rock, pop y folk n’once establecimientos de la ciudá, dando una vuelta al formatu utilizáu n’ediciones anteriores. Pero ésta nun ye la novedá única, yá que los organizadores y músicos asturianos, amás de recordar a los dos ‘felpeyos’, pretende aprovechar l’homenaxe pa denunciar la situación llaboral precaria que viven los profesionales de la música n’Asturies. Nesi sen, hai que recordar que la muerte d’Igor y Carlos nun vino provocada por un accidente de tráficu ensin más, sinón por un accidente llaboral, yá que’l grupu se treslladaba hacia Catalunya de madrugada pa una actuación esi mesmu día tres salir de Tresona, onde’l grupu nun pudo tocar en San Xuan por un problema llétricu depués de tratar de negociar pa ser los primeros n’actuar por mor del desplazamientu posterior a tierres catalanes y non a les cuatro la mañana, como obligaba la organización.

Asina, en cada conciertu, va lleese un manifiestu que recueye les vindicaciones de los músicos asturianos. Nella recuerda que l’accidente tuvo que ver “cola precariedá” de la profesión y que, precisamente por ello, nun se consideró como llaboral; una situación, la de precariedá, “que siguen soportando la mayor parte de los y les trabayadores de la música”, polo qu’esponen delles demandes. En primer llugar, soliciten que nun se cotice namái’l día nel que se trabaya, al igual qu’asocede n’otros estaos europeos, y que les instituciones llocales dexen de persiguir a los establecimientos qu’ufren música en direuto, yá que “la música ye cultura y la cultura ayúdanos a ser meyores persones”. Por último, demanden a les instituciones un circuitu profesional n’Asturies pa los músicos del país, cola presencia de la música asturiana en feries o en cualquier actividá de promoción “de la ‘marca Asturies’”.

Los conciertos

El festival ‘N’Alcordanza d’Igor y Carlos’ d’esti añu va inaugurase’l vienres 28 en Toma 3 cola actuación de Moonglow (20 hores), pa depués continuar colos conciertos en The Class de Los Izquierdos y Lucas y los Patosos (21.30 hores). La celebración va siguir nel Muddy’s con la ‘Folixa N’Alcordanza 2013’, a partir de les 00.30 hores.

Yá de sábadu, l’actividá va principiar bien ceo, a les 13 hores, cola música de Rubio, Pizarro, García y Morales nel Café Alambique. A les 14.30 hores, va actuar Toli Morilla vs El Tamar en La Vida Alegre, y Ismael Tomás y Mariluz Cristóbal Caunedo na Sidrería Canteli, pa continuar a les 17.30 hores nel Ca Beleño con Cazurrín, Tuenda y Felpeyu. Pa les 19 hores ta previstu un conciertu de DRD y Seu nel Café Trisquel, a lo que van siguir les actuaciones de The Traveling Zoo y Luis Dadá n’El Patio de la Favorita (20.30 hores) y de Lavandera y Medication/2 nel Café Dam (22 hores). Nacho Vegas, Pauline en la Playa y Radio Fox van zarrar estes dos xornaes de música en direuto n’alcordanza d’Igor y Carlos con un conciertu nel Buddha a partir de les 23.30 hores.