La música asturiana llora güei a Carlos Redondo y Igor Medio

Los dos miembros del grupu folk Felpeyu fallecieron ayeri sábadu n'accidente de coche cuando'l grupu diba pa Cataluña a tocar. Tolos grupos que tocaben ayeri ficieron homenaxe a los dos músicos desapaecíos, como na nueche folk de la playa de la Espasa, onde actuaron, dempués de pensar en suspender les actuaciones, Lliberdón, Xuacu Amieva y Dixebra, y onde'l públicu aplaudió un tiempu bien grande n'anunciando los intérpretes que-yos dedicaben el conciertu a los dos fallecíos.

Pela so parte, el local onde teníen d'actuar ayeri los "Felpeyu" nel Festival Internacional de Folk de Calaf en Cataluña echó'l piesllu en señal de duelu. Llan de Cubel, qu'estos díes ta faciendo una xira pelos Estaos Uníos, pensó en suspender los conciertos tres de conocer la noticia, los mesmo que tamién tuvo a punto de facer el gaiteru Jose Ángel Hevia que tocaba na nueche d'ayeri n'Huesca.

L'accidente tuvo llugar al salise de la carretera'l vehículu en que diben los músicos cuando circulaben pela autopista AP-68 a l'altura de Zuya (Álava) hacia les 8 y media de la mañana. El restu de los componentes de la banda Ruma Barbero, Xuan Nel Expósito, Fernando Oyagüez, Diego Pangua, Lisardo Prieto y Slaven Kolak, el so técnicu de soníu, tienen mancadures de diversu calter anque nun cuerren peligru, siendo Xose Nel Expósito, Steven Kolak y Lisardo Prieto los que sufren fractures de más dañu.

Con too y con ello, tolos componentes del grupu yá s'alcuentren n'Asturies, quitando'l casu del curdioneru Xuan Nel Exposito que fadrálo en poques hores depués de facer unes prebes médiques.

Tola prensa asturiana y de fuera d'Asturies faese ecu del duelu que vive güei tola comunidá musical asturiana, onde Ígor y Carlos yeren conocíos abondo, siendo la so carrera en "Felpeyu" namás una parte de les sos actividaes musicales, Ígor Medio y Carlos Redondo son dos nomes que tuvieron presentes en bien de proyectos musicales a lo llargo de los últimos 20 años de música n'Asturies. Nel casu d'Ígor Medio, amás de tocar el bouzouki y cantar en Felpeyu, entamó en 2003 -xunta Carlos Redondo- la casa de discos "Tierra".

De va pocu tiempu va p'acá entamara un proyectu muscal nuevu xunta'l tamién componente de Felpeyu Lisardo Prieto, asoleyando apocayá'l so primer discu "Dual". Amás, Ígor tamién desenvolvió un intensu trabayu como productor y arreglista en discos de xente como Flavio Rodríguez, Tejedor o Gatos del Fornu por poner un casu. Too esti trabayu llevó a Ígor a garrar nome internacional participando nes dos últimes ediciones nel Celtic Connections nel conciertu Harvest, del que'l propiu Ígor fizo una crónica p'Asturies.com.

Ígor Medio tamién rescampló n'otra faceta artística como yera la de dibuxante. Foi responsable de comics como Love Gun xunta'l dibuxante Javier Rodríguez, anque últimamente yera más conocíu pola tira de La Familia Catañón, qu'espublizaba tolos veranos nel diariu La Nueva España, tira de la que l'añu pasáu sacó una recopilación.

Carlos Redondo, alias Loco, tamién foi una persona mui activa trabayando en bien de proyectos musicales d'estilos abondo estremaos. Carlos Redondo, casáu y con dos fíes, yera una auténtica institución de la la música asturiana.

Polifacéticu, entusiasta y trabayador incansable rescampló como músicu, profesor, productor y inxeñeru de soníu. Pa muncha xente ayena al folk Carlos va ser recordáu como cantante y baxista del de Los Locos, un grupu de pop que foi referencia n'Asturies nos 80 y principios de los 90.

Pa tolos sos alumnos Carlos va ser el profesor cercanu con gran capacidá didáctica y col que nun había distancies. Embaxo del somantu de Carlos espoxigó una xeneración de baxistes formaos por elli que participaríen en grupos de lo que depués se llamó Xixón Sound (Penelope Trip, Kactus Jack, Undershakers…), un movimientu nel que nos sos primeros momentos, y primero de que'l so compañeru de Los Locos, Paco, garrara'l relevu, fixo la producción de los trabayos de Penelope Trip y Eliminator Jr. Depués de desfacese Los Locos a mediaos de los 90, Carlos entamó a metese pela música folk, pasando a formar parte del grupu Felpeyu y collaborando con otros grupos como Lliberdón y Tejedor.

Ígor y Carlos coincidíen en tener una bayurosa carrera artística, pero sobre too, pa toles persones que tuvieron la suerte de conocelos, independientemente de los ámbitos profesionales o académicos, fueron unes persones siempre cola sorrisa na cara y dispuestos a echar una mano.

La redacción d'Asturies.com quier facé-y llegar el nuestru pésame más fondu a la familia y amigos d'estos dos grandes músicos y persones.