La lluvia dio tregua y permitió la celebración de la ‘Alborada del mar’ na xornada última del FIDO

El Festival Intercélticu d’Occidente (FIDO) despidió la so decimoquinta edición con una xornada enllena d’actividaes que se desarrollaron pese a l’amenaza de lluvia. La ‘Alborada del mar’axuntó a les cinco agrupaciones participantes nel puertu.
 
Alredor de les 11.30 hores, la Banda de Gaites Villa de Mieres abrió’l desfile que percorrió les cais de Tapia. Tres los mierenses salió la Gibraltar Sea Scouts Pipe Band (Gibraltar), la Banda Atlántida de Matamá (Galicia) y el grupo Corisco (Galicia), pa zarrar la marcha los bretones de la Bagad Cercle Ker Vourdel. Per media hora, los gaiteros fixeron les delicies de tapiegos y visitantes que siguieron el desfile qu’atravesó’l centru de Tapia p’acabar na ilesia parroquial de San Esteban, onde tuvo llugar la misa folclórica.
 
A les 14 hores, na Casa Conceyu, celebróse un actu institucional nel que les cinco formaciones participantes estos díes nel FIDO intercambiáronse detalles de los sos llugares d’orixe. “Gracies por facenos disfrutar cola vuesa música, los vuesos bailles y la vuesa amistá”, dixo l’alcalde de Tapia, Manuel Jesús González, a los representantes de les agrupaciones, pa depués ratificar a la Banda de Gaitas Occidente, organizadora del FIDO, l’apoyu del Conceyu al festival. D’igual forma, destacó la intención del gobiernu muncipial de principiar conversaciones coles ciudaes de los grupos que participaron nel eventu posibles hermanamientos y comprometióse a trabayar p’algamar la reconocencia del FIDO como Fiesta d’Interés Turísticu Autonómicu.
 
Mentes, Martín Fernández Cascudo, direutor del festival, agradeció a los músicos “el so comportamientu exemplar” nos seis díes de duración y destacó’l trabayu del equipu de 30 persones que fixo posible la celebración d’esti certame que cumplió 15 años de vida. “Fiximos grandes amigos y queremos siguir faciéndolos añu a añu y seguir conociendo cultures nueves y grupos gracies al festival”, aseguró. Nel actu tamién tuvo presente la conceyala de Bienestar Social, Mayores, Integración Social, Imigración y Educación de Mieres, Mari Luz Fernández, que brania tolos años en Tapia. “Felicítovos por convertir a Tapia nun referente cultural con este Festival”, declaró.