La llista d'Iglesias supera ampliamente a la d'Errejón en Vistalegre II

Habrá namái cuatro asturianos nel Conseyu Ciudadanu nuevu de Podemos tres la salida de Segundo González García, Laura Casielles y Xuacu Rodríguez Morón.

Les bases de Podemos confíen a Pablo Iglesias el timón de la formación tres la votación celebrada esta fin de selmana mientres el congresu de la formación nel Palacio de Vistalegre Arena, superando asina a Íñigo Errejón, col qu'amosara discrepancies en públicu nes selmanes últimes. Asina, la llista del secretariu xeneral –que va siguir nel cargu tres superar tamién a Juan Moreno Yagüe con un 89,09 por cientu d'apoyu– sumó 37 representantes nel Conseyu Ciudadanu, por 23 del so rival y los 2 de la corriente de Miguel Urbán y Teresa Rodríguez.

Asturies va contar con cuatro representantes en dichu muérganu del partíu, dos menos qu'hasta agora. Amás de Daniel Ripa, como secretariu xeneral de Podemos Asturies, entra Sofía Fernández Castañón y siguen Estefanía Torres, dambes na candidatura d'Iglesias, y Tania González Peñas, na d'Errejón.

Queden fuera González García, que tamién diba na d'Errejón, y Casielles y Rodríguez Morón, que nun participaron en nenguna llista. 157.569 persones votaron nesta ocasión, de les que 2.379 fixéronlo en blancu.

L'asturianu presente namái na boca de Fernández Castañón

Podemos escaecióse nel congresu de Vistalegre de la llingua asturiana nel escenariu instaláu nel llugar, onde destacaben pallabres en toles llingües oficiales del Estáu como 'Dignidad', 'Pobo', 'Demokrazia' o 'Participació'. La única presencia del idioma foi por iniciativa de Fernández Castañón, qu'emplegó delles pallabres n'asturianu na so intervención.