La llinia aérea asturiana va entamar operaciones n'ochobre

La compañía Air Asturias va entamar nel mes de setiembre la venta de los sos primeros vuelos, que van despegar dende l'aeropuertu d'Asturies a últimos d'ochobre.
Los primeros destinos de la llinia aerea de capital asturianu van ser Roma, Milán, Lisboa y un aeropuertu alemán aún entovía por confirmar. Pa más en p'alantre, Air Asturias cuenta con apurrir serviciu a México, Panamá o Venezuela, países nos que'l grupu Celuisma, accionista de la llinia, tien hoteles propios y a los que se llegaría al traviés de vuelos con enllaz en Madrid.


La empresa pidió-y al ente xestor d'aeropuertos AENA los güecos pa operar polo menos con cuatro frecuencies a la selmana pa caún de los vuelos que van salir dende Asturies. La llinia va tener de mano dos aviones propios anque cuenta con amestar un tercer aparatu, toos ellos del modelu Airbus A320.

La empresa Celuisma, canal hotelera fundada a primeros de los años 80, ye la principal accionista d'Air Asturias y tien anguaño'l 20% de la empresa de vuelos baratos Air Madrid, que conecta la capital española con dellos destinos n'América del Sur. En Air Asturias Celuisma, propietaria ente otros del hotel Marsol de Candás, pasa a ser sociu mayoritariu col 78% del capital contra'l 20% del grupu Mall, constructor ente otros del Centru Comercial Los Fresnos de Xixón, mientres que'l Grupu Edefa, del que vien el director de la llinia, Javier Taibo, tien el 2%. La empresa contaba con entamar a volar a primeros d'esti añu, pero nun pudo por causa polo complicao de los trámites.