La llingua y historia d’Asturies tienen espaciu esti martes nel FICX

El Festival Internacional de Cine de Xixón (FICX) dedica la xornada del martes 23 a la llingua y historia d’Asturies. L’actu “Ven a da-y la llingua nel festival” y la presentación del documental 34-54 formen el programa.

A les 17 hores nos cines Centru de Xixón va arrancar l’actu “Ven a da-y a la llingua nel festival”. Nél, va presentase’l cómic “Manzajú” de Ruma Barbero – cola intervención del autor, Miguel Rojo y Consuelo Vega, pa dempués proyectase “A religiosa portuguesa”, película subtitulada al asturianu.

Per otru llau, el realizador y dibuxante asturianu Alberto Álvarez García va presentar el documental 34-54. Al traviés de los testimonios de diez asturianos y asturianes, esta obra fala del exiliu en Francia, arrancando dende la represión a la Revolución de 1934.

El documental, que va presentase a les 19.45 nel CMI Xixón-Sur, cuenta la vida d’estos exiliaos per campos de concentración franceses y alemanes, la so participación en La Resistencia y, ente otres, la victoria final sobre los nazis.