"La llingua en Lleón tien futuru, pero fai falta l'apoyu institucional", indica Xairu López

Xairu López y Nicanor García de l'asociación cultural Faceira falaron de la situación de la lliteratura y del idioma en Lleón na UABRA.

El xueves 3 d'agostu, dientro de les xeres complementaries de la UABRA, hubo la conferencia 'Lliteratura y movimientu de vindicación en Lleón' na que Xairu López y Nicanor García de l'asociación cultural Faceira falaron de la situación de la lliteratura y del idioma nes tierres lleoneses.

Xairu López fixo un repasu a la historia de la lliteratura nos caberos años rescamplando dos exes fundamentales. El primeru ye'l noroccidental con escritores como Eva González, Roberto González-Quevedo, Emilce Nuñez o Severiano Álvarez. El so testigu tan recoyéndolu escritores mocos gracies a los certámenes lliteriarios que sirven pa revitalizar l'idioma. L'otru gran focu ye la ciudá de Lleón, como polu d'atracción na qu'aporta xente falante patrimonial d'estremaes comarques que-y dan visibilidá a la llingua. D'esta fastera tenemos a autores como Xosepe Vega o Hector Gil. Ye de destacar l'aparición de la editorial Filandon, perimportante na difusión de la lliterartura en lleonés, anque la novela sigue siendo l'asignatura pendiente. "La llingua tien futuru, pero fai falta l'apoyu institucional", indica Xairu López.

Pela so parte, Nicanor García repasó les principales torgues del idioma en Lleón, dalgunes asemeyaes a otres partes del dominiu, onde la xente mozo nun quier falar lleonés y los vieyos que lo falen tan morriendo. Destacó'l nulu interes pol idioma dende les instituciones polítiques y la universidá de Lleón. Y anque nel artículu 5.2 del Estatutu d'Autonomia de Castiella y Lleón indica que'l lleones será oxetu de protección y promoción nun faen un res. Nicanor Garcia quiso indicar que ye necesaria una collaboración en tol dominiu pa evitar la desaparición de la llingua.

Na charra valorose mui positivamente les publicaciones y actividaes qu'entama Faceira, como'l cursu de lleonés na ciudá de Lleón. Pero ye evidente qu'ensín l'apoyu o implicación institucional, como manda l'estatutu, poco va poder facese pa revitalizar la llingua.

Como proyectos de l'asociación dieron anuncia de la publicación de 'Esbardu. Vocabulariu llionés ilustráu', un llibru con dibuxos a color, del ilustrador lleonés Ricardo Escobar, pensáu pa que los neños puedan conocer un vocabulariu básicu de lleonés. Amás, cuenten con asoleyar nel primer semestre del 2018 el 'Diccionariu Llionés'.

Na semeya: Nicanor García, Hector Gil y Xairu López.