La llingua asturiana nun sal del requexu na ESO

La Conseyería d'Educación apurrió datos sobre la matriculación n'asignatura de llingua asturiana na Secundaria Obligatoria nel cursu 2004-2005 nel actu de presentación de los manuales nuevos de llingua pa segundu y cuartu de la ESO, asoleyaos respectivamente poles cases editoriales VTP y Trabe. Según los datos qu'apurrió Fernando Padilla, representante de la Conseyería nel actu que tuvo llugar na biblioteca Pérez de Ayala d'Uviéu, un total de 69 centros de secundaria, lo que supón el 84% del total y dos centros más que nel cursu anterior, ponen anguaño clas de llingua, una asignatura que reciben 3.702 alumnos. Ello nun supón xuba en términos absolutos sobre les cifres del cursu 2004-2005, en qu'hebo 3.706 estudiantes matriculaos, pero sí hai una pequeña xuba porcentual por causa de la baxada demográfica, y ye que nel cursu anterior yeren el 15,88% de los estudiantes d'ESO los qu'estudiaben asturianu, mientres que nel 2005-2006 son el 16,5% del total de los estudiantes de secundaria los que reciben esta enseñanza na ESO, mientres que en primaria los porcentaxes leven yá años alredor del 50%.