La llimpieza del Seya acaba enantes d'entamar

Depués d'años de pescar nelli, el fondu del Riu Seya ta tresmáu de chombos, los plominos que se ponen nes cañes de pescar. Como metal pesáu que ye, el plombu ye ún de los materiales más contaminantes que suelen alcontrase nos ríos. Contra esta situación, l'Asociación Océano Alfa entamó nel 2.001 un proyectu col oxetivu de
recuperar tol plombu que se pudiere atropar nel
fondu del ríu Seya y investigar en
materiales alternativos pa sustituyir esti metal.

La cosa entamó na seronda del 2.001, cuando la productora de documentales Animal's House taba rodando un documental nel ríu y l'equipu de grabación decatose de la cantidá de metal qu'había metío en ríu. Col envís de buscá-y igua a esta situación, metiéronse nun proyectu nel que la primer fase foi el facer l'estudiu d'allugamientu, sedimentación
y espardimientu del plombu. Los datos que salieron d'esti estudiu foron ablayantes. El ríu tenía tonelaes enteres de metal que nun había más manera de sacar qu'a mano. Pa más aquello, los chombos col tiempu queden tapaos faciendo capes enterraes en mediu metru de basa y arena, y tolos años recibíase un aporte nuevu que l'estudiu peritaba en cerca de 6.000 kilos.

La siguiente fase consistió n'organizar equipos de voluntarios que retiraren el metal, pero pa esti llabor nun valía cualquiera, y tolos voluntarios teníen de ser xente con conocimientos de submarinismu y llicencia p'andar somerguyándose, sobremanera nes poces más complicaes. Nel primer añu de trabayu, la campaña foi a atropar 600 kilos de metal, y esti añu yá taba too preparao pa volver al tayu. La cita yera nel Pozu Tempranes, y contábase con tener entamao pa la otra selmana, pero los acontecimientos acabaron cola campaña enantes de qu'entamare.

Ello foi que, según denunciaron los responsables d'Oceano Alfa, la sociedá de pescadores "El esmerillón" que tamién taba desarrollando una campaña de retirada de plombu por cuenta propio, subastó entre los sos socios los chombos qu'ellos mesmos pañaren pa volver a pescar con ellos, colo que'l metal volvería al ríu. Da la circunstancia de que El Esmerillón, que tien más de 1.000 socios, recibiere una subvención del principáu de 6.000 euros pa contratar buzos nesta campaña. Esta subasta, que llegaron a conocer per un portal d'internet, foi lo qu'acabó cola pacencia del equipu d'Oceano Alfa, que dixo que tampoco nun ve que tenga munchu xacíu sacar -con munchu esfuerzu- 600 kilos de plombu pa que nun añu vuelvan a echase otros 6.000.

Por ello, esti añu nun van haber buzos pañando plombu nel Seya, pero Oceano Alfa dixo que van seguir alantre con otra de les llinies del proyectu, que consiste n'atopar un material alternativu al plombu, un material que tien regulación específico en dellos países como Noruega o los EEXX pero qu'equí naide nun controla como y onde se usa. Nesta otra xera parez que yá hai camín andáu, y asina presentaron dellos materiales ente los que'emponderaron el "Stonze" una piedra poroso que va dase a dellos pescadores pa que lo preben