La Lliga Celta d'Asturies va dedicar una conferencia al osu pardu

|
Osu

Va ponela'l vienres 19 n'Uviéu Carlos Nores.

La Lliga Celta d'Asturies ta acabante d'anunciar la que va ser la so próxima actividá. Trátase d'una conferencia entitulada 'L'osu: característiques y analís de la so situación güei' a cargu del doctor en Zooloxía, profesor titular xubiláu de la Universidá d'Uviéu y investigador nel Institutu de Recursos Naturales y Ordenación del Territoriu (INDUROT).

Fernán Morán, presidente del coleutivu, va encargase, tres la intervención de Nores, de dar unes pincelaes del papel del osu pardu na cultura tradicional asturiana. "Promete ser un eventu bien entreteníu, aptu pa tolos públicos y bien interesante, yá que falamos d'un animal míticu, casi totémicu para los/es asturianos/es, analizáu de la mano d'ún de los académicos que meyor conocen esta materia n'Asturies", anuncien dende la Lliga Celta d'Asturies.

L'actu va celebrase, dende les 19.30 hores, nel Hotel d'Asociaciones de Santuyanu, asitiáu na cai Joaquín Costa númberu 48 d'Uviéu. La entrada ye llibre hasta completar aforu.

 

Contador Estadistiques