La Llibrería Cervantes va acoyer la presentación de ‘L’alma robada’, obra con testos de Pablo Texón

Esti xueves va tener llugar na uviedina Llibrería Cervantes la presentación de ‘L’alma robada’. Esta obra recueye 14 testos en prosa poética de Pablo Texón sobre semeyes de l'actualidá diaria feches por Mario Rojas y Pablo Lorenzana.

 

En ‘L’alma robada’, trabayu espublizáu por Publicaciones Ámbitu, l’escritor ayerán demuestra toles sos habilidaes a partir de semeyes d'estos dos profesionales del fotoperiodismu. Una fotografía del rodaxe n’Uviéu de la película ‘Vicky Cristina Barcelona’, d’una manifestación pola oficialidá del asturianu, d’un trabayador inmigrante o d’un mendigu sirven a Texón pa redautar testos qu’aspiren a descubrir la verdá interior de les coses.

 

Ricardo Saavedra esplica nel prólogu del llibru cómo Texón “garra una semeya de l’actualidá inmediata y conviértela n’artefactu lliterariu, nun testu onde les palabres esvanecen, dexen de ser llinguaxe y enayénense en mundu: creen una imaxe nueva, plena y suficiente. Los güeyos del autor miren llateralmente les coses, penetrándoles. Posen sobre’l documentu gráficu que-y proponen, pero en realidá tan mirando acullá”. La hora d'entamu de la presentación va ser les 19.30 hores, actu nel que van tar presentes Saavedra y los trés protagonistes del llibru.