La llibertá provisional pa los miembros de l'autonomada 'Manada' moviliza a la sociedá

Convocaes movilizaciones de protesta en numberoses poblaciones asturianes.

La seición segunda de l'Audiencia de Navarra decretó ayeri llibertá provisional pa los cincos miebros de l'autonomada 'Manada' condenaos a 9 años de cárcel por abusu sexual el pasáu mes d'abril. Los sevillanos José Angel Prenda, Ángel Boza, Jesús Escudero, Alfonso Jesús Cabezuelo y Antonio Manuel Guerrero caltuvieron rellaciones sexuales en grupu mientres les fiestes de San Fermín, n'Iruña, del 2016 con una moza madrilana de 18 años que los denunció por violación.

La sentencia provocó nel so momentu una corriente d'indignación en tol Estáu al considerar baxa la condena y pol mensaxe que manda sobre la violencia contra la muyer. Ésta repitióse ayeri tres conocese que los trés maxistraos de la sala, con un votu en contra, opten pola llibertá provisional de los cinco –previo pagu de 6.000 euros caún– hasta que la condena sía definitiva en llugar de por una prórroga d'encarcelamientu agora que van cumplir el máximu de 2 años de prisón preventiva.

A les 19 hores

La Plataforma Feminista d'Asturies convocó darréu de conocese la noticia convocatories de protesta contra la decisión de l'Audiencia de Navarra. Éstes van celebrase a les 19 hores d'esta tarde n'Uviéu (Xulgaos de Llamaquiquie), Xixón (plaza Institutu/El Parchís), Avilés (El Parche), Cabanaquinta (Casa Conceyu), Piedrasblancas (Casa Conceyu), Cuideiru (Casa Conceyu), Ribeseya (Casa Conceyu), Ḷḷuarca (Casa Conceyu), Navia (Casa Conceyu) y La Felguera (Abastos).