“La Llei d’Usu foi un milagru y un ésitu”, asegura Sánchez Vicente

|
“La Llei d’Usu foi un milagru y un ésitu”, asegura Sánchez Vicente

Esti vienres, 23 de marzu, cúmplense 20 años de l’aprobación na Xunta Xeneral de la Llei de Promoción y Usu del Bable/Asturianu, una historia que recordamos nesti reportaxe. “Foi un milagru y un ésitu”, afirma Xuan Xosé Sánchez Vicente, que dende’l PAS negoció col PP de Sergio Marqués el sacar alantre una norma mui criticada nel so tiempu.

“L’otru día nel alderique qu’hebo n’Uviéu dixeron que la Llei d’Usu aprobóse por unanimidá. Tengo la dulda de lo que votó al final Antón Saavedra, pero tol mundu taba contra d’ella. Ye engañosa esa unanimidá”, recuerda l’únicu diputáu asturianista naquella llexislatura, na que’l Partido Popular (PP) gobernaba con 21 escaños en minoría énte una FSA con 17 y una Izquierda Unida (IU) con 6, que más tarde seríen 5 tres la salida de Saavedra. Y ye que’l testu negociáu col presidente Marqués por Sánchez Vicente y Xesús Cañedo, indignaos pol primer documentu presentáu pola Conseyería de Cultura dirixida por María Victoria Rodríguez Escudero, tuvo enmiendes tanto del PSOE como d’IU que dexaron una norma final que “salió bastante bien pese a todo, con coses, eso sí, que nun me prestaron”.

El socialista Pedro de Silva foi’l primeru que trató poner en marcha la Llei d’Usu “pero nun tuvo apoyos nin nel PSOE nin ente los dirixentes del PP, siguiendo les tesis de los Amigos de los Bables”. Nun sería hasta l’añu 1996 cuando’l Partíu Asturianista (PAS) punxo sobre la mesa del popular Sergio Marqués la creación de la norma a cambiu d’apoyar unos presupuestos que la Xunta Xeneral valtó nun primer momentu y que la salida de Saavedra del grupu parllamentariu d’IU pa pasar al grupu mestu abría la puerta pa que salieren alantre.

“Pese a manifestase en conta la executiva del PP y el ruíu de toda esta xente –en referencia a los Amigos de los Bables–”, Marqués decidió roblar l’alcuerdu. “IU y el PSOE taben en contra; los primeros dicíen que yera una traición y que cortaba’l camín hacia la oficialidá, mentes que los segundos cenciellamente nun queríen nada”, apunta Sánchez Vicente, que recuerda que yeren necesarios 23 votos pa poder aprobala y que “Saavedra opúnxose tres falar con Alarcos y Bueno”.

“Foron 8 meses de filibusterismu políticu”, asegura’l xixonés, qu’enantes tuvo que negociar direutamente con Marqués el testu tres recibir un documentu “impresentable, que falaba de bables”. “Metímonos Xesús Cañedo y yo nel despachu con él y iguamos un testu nuevu nel que’l mayor ésitu foi que s’incluyera’l términu de ‘llingua tradicional’. Queríamos dexar claro que l’asturianu ye una llingua, pa poder encalzar asina cola Constitución”, destaca.

Nesti puntu recueda’l socesu acontecíu en Madrid col primer Estatutu d’Autonomía d’Asturies: “Yo redauté l’artículu 4, qu’incluyía que l’asturianu yera ‘llingua específica’ d’Asturies. Pedro de Silva llamóme pa dicime qu’o se quitaba o nun había artículu 4”, incluyéndose definitivamente que ‘el bable gozará de proteición…’.

A la llende de la oficialidá

Finalmente la Llei d’Usu aprobábase’l 23 de marzu del 98 “pese a les resistencies de toos”. “Foi un milagru y un ésitu; milagru porque dientro del PP había presiones pa que nun saliera alantre y hasta esi mesmu día nun sabíemos si diba a haber diputaos que votaran en contra, y ésitu porque la Llei d’Usu llega a la llende de la oficialidá”, añade.

El problema qu’atopó la norma ye “que nun se desarrolló en nada. Nunca hebo voluntá política de ponela en práutica, nin cuando Izquierda Unida y el Bloque por Asturies tuvo nel Gobiernu xunto col PSOE, y hai aspeutos como la enseñanza, la toponimia o l’usu nos ayuntamientos nos que se pudo facer más”.

La normativa actual sobre l’asturianu, poro, “tien entovía munchu percorríu” a falta d’una oficialidá que Sánchez Vicente entovía ve llonxana: “Tengo la dulda del PSOE, non del PP o Ciudadanos”, asegura. “Nun ye sólo qu’haya aritmética parllamentaria n’Asturies, ye lo que se quiera dende Madrid, y la visión que se dio cuando s’abrió esti debate agora sobre la oficialidá ye que nun quieren abrir más portielles, como asocedió col artículu 4 del Estatutu”, considera’l xixonés.

Nesti puntu tamién recuerda la posibilidá que se perdió cola oficialidá diferida que’l PAS propunxo incluyir na reforma del Estatutu “y que posibilitaba l’aprobación de la cooficialidá con una votación a cinco años nos que valía una mayoría simple”. Al respeuto detalla cómo “Cascos, Isidro y Cherines propunxéronla a Suárez y a Noval, considero que pa comer terrén a Marqués y al so proyeutu políticu nuevu” y cómo los socialistes “nun quixeron sigui-yos el xuegu”.

Unos tiempos de munchu movimientu políticu nos que la formación que lideraba Sánchez Vicente recibió munches crítiques, inclusive dende dientro d’ámbitos asturianistes y sindicales. “Llamáronnos de too”, apunta al tiempu que ve con satisfaición cómo aquella norma aprobada hai 20 años “cuando nun había nada” ye agora emponderada a la espera de qu’esista una voluntá política pa desarrollala dafechu hasta que llegue “una reforma del Estatutu que duldo muncho que s’abra namái pa incluyir la oficialidá”.

Alderique polos venti años

Baxo’l títulu de ’20 años de la Llei d’Usu y Promoción del Asturianu’ esti llunes celebróse n'Uviéu un alderique entamáu pola Conseyería d'Educación y Cultura nel que tomaron parte José Manuel Pérez Fernández, lletráu del Tribunal Constitucional y profesor de Derechu Alministrativu de la Universidá d’Uviéu; Leopoldo Tolivar, caderalgu de Derechu Alministrativu de la Universidá d’Uviéu; y l’abogáu Nicolás Bartolomé. Los trés xuristes coincidieron en que'l problema de la norma ye que nun se desarrolló tolo posible, asina como na necesidá d'avanzar hacia la oficialidá. (Calca equí pa ver la noticia completa)

Contador Estadistiques