La Llei de Llingües d'ERC sigue alantre en Congresu

El Congresu de los Diputaos almitió a trámite esta selmana’l proyectu de Llei de Llingües d’Esquerra Republicana de Catalunya (ERC), que defende na so redacción orixinal la oficialidá del gallegu nel occidente d’Asturies nuna de les sos disposiciones adicionales. Asturies.com falo d'ello con responsables de la estaya d'Ensenyament i Cultura d'ERC, competente nesti asuntu.

La referencia a la oficialidá del gallegu nel occidente d'Asturies, que se caltién na propuesta rexistrada nel parllamentu, resquemó abondo nel movimientu asturianista, n’organismos oficiales como l’Academia de la Llingua Asturiana y na propia sociedá del occidente d'Asturies, que la vieron como una inxerencia na política llingüística asturiana. Tres de les reaciones y l'espolín nos medios de comunicación el diputáu Joan Puig comprometióse con Andecha Astur, partíu que trabaya en comuña con ERC dientro de la coalición europea “Europa de los Pueblos”, a camudar la redacción orixinal por una fórmula que fadría referencia a “facer oficial el gallegu nes zones onde se fale esta llingua”.


Ayeri, dende la Secretaría d’Ensenyament i Cultura de la formación nacionalista catalana comentóse a Asturies.com que "la versión del testu acabante pasar a trámite en Congresu de los diputaos ye la qu’incluye la redacción orixinal", y que tou cambéu sobre l'orixinal tendrá d’esperar al periodu d’enmiendes.

Anque dende les fontes consultaes por esti mediu n'ERC nun quixeron pronunciase sobre si va facese o non la modificación comprometida, sí que s'afitó la validez filolóxica que tien pa ERC la solicitú de facer el gallegu oficial nel occidente asturianu, refiriéndose a llingüistes de la sectorial d’ERC qu’encamentaron a los redactores de la llei en base a estudios academicos y llinguisticos de la Universidá de Barcelona l’enxertamientu del gallegu n’Asturies. Ente les fontes citaes a Asturies.com dende ERC y que s’emplegaron na redacción de la Llei apurrióse la Gran Enciclopedia Catalana, que da una definicion del dominiu llingüísticu gallegu qu’enxerta l’occidente asturianu nel mesmu, neto qu’estudios de la Universidá de Barcelona del filólogu Jose Enrique Gargallo que na so obra “Les llengues romaniques” fala de la estension del gallegu per 14 conceyos del occidente d'Asturies. El fechu de que la mesma denominación oficial de la fala d’entrambasauguas sía la de “gallego-asturiano” ye pa los responsables de cultura d’ERC un bon niciu, según s'esplicó a Asturies.com, qu’afita la pertenencia a la llingua gallega de la variante conocida llegalmente con esi nome.

El fechu de que se solicite la oficialidá del gallegu nuna parte del territoriu asturianu mentres que la llingua asturiana tea ausente de tola redacción del testu, sacantes una alusión indirecta que fala del reconocimientu de “otres llingües non oficiales del estáu” en cuantes estes se faigan oficiales, supón pa ERC que "pa qu’una llingua pueda reconocese na llei ésta ha ser oficial na so comunidá autónoma", cosa que pel momentu nun se da n’Asturies, qu’ha ser quien dea “el primer pasu”.


Dende ERC reconocióse a Asturies.com que la redacción del artículu sobre’l gallegu n’Asturies fíxose dende l’aplicación del mesmu razonamientu que lleva a ERC a defender la oficialidá del catalán en territorios d’Aragon, declarándose tar al tantu de la situación que se da n’Asturies respectu a la demanda esistente al favor de la oficialidá, anque según se comenta, ún de los problemes p'algamar la oficialidá del asturianu ye "la falta d’unidá de la llingua y d’una mayor homoxeneidá ente les sos variantes”. En tou casu espresóse la disposición d'ERC a incluyir na tramitación de la Llei "modificaciones que la meyoren" y convidóse a los diputaos asturianos a facer les sos aportaciones.