La Llegra entama una campaña de socios y socies

Busca caltener l’autoxestión d’esti espaciu uviedín que desendolca actividaes culturales y reivindicatives.

Inauguráu en marzu por iniciativa de la izquierda soberanista asturiana, el Llar la Llegra convirtióse nun referente na vida cultural d’Uviéu. Charres, conciertos y actividaes festives celebráronse nesti llocal asitiáu na cai Postigu Baxu que ta abiertu a vecinos y coleutivos.

Tres una campaña de cuestación popular pela rede pa poder adecentar la sede escoyida, los responsables de La Llegra entamen agora una campaña de socios y socies col oxetivu de caltener l’autoxestión del espaciu, con cuotes mensuales que pueden dir dende los 5 a los 20 euros, o la voluntá. “Unos meses depués del crowdfunding, tornamos a pidir la vuesa collaboración pa siguir faciendo posible un espaciu físicu xunitariu de la izquierda soberanista n’Uviéu, mediante una campaña de socies y socios que tamos entamando. L’oxetivu nun ye otru qu’algamar un colchón económicu que faiga más afayadizu’l trabayu diariu nun llocal abiertu a quien quiera usalu, y que como cualquier otru, xenera unos gastos fixos mensuales”, apunten nun comunicáu.

“La Llegra ye un espaciu físicu, pero tamién un espaciu políticu y de xuntanza de persones de munches sensibilidaes polítiques y sociales, que nun llenda’l so llabor a un simple llocal: la dinamización de bloques soberanistes nes manifestaciones, la participación n’actividaes autoxestionaes nel barriu, o’l trabayu de confluencia n’espacios como Asturies en Pie, son dalgunes de les pates d’esi otru llabor que fai posible La Llegra, siempre col enfotu y l'oxetivu firme de dar forma, construyir y afitar un movimientu soberanista con capacidá pa tresformar esti país y algamar una Asturies llibre de tou tipu d'opresión, onde les asturianes puedan vivir dignamente”, continúa’l mesmu.

La xente interesao pue contautar con La Llegra nel corréu electrónicu espaciulallegra@gmail.com o peles redes sociales.