La Llegra entama actividaes en llinia, qu'abre Galán con una charra sobre l'idioma

|
Amadéu Benavente y Inaciu Galán charra Ástura Franquismu

'La llingua asturiana nel Franquismu' ye'l títulu de la intervención basada na so tesis doctoral.

Calificada con sobresaliente cum laude y propuesta a Premiu Estraordinariu de Doctoráu, nella apaecen casos qu’ilustren la represión llingüística xeneralizada que se vivió nes escueles demientres el Franquismu; el papel del Instituto de Estudios Asturianos (IDEA); la situación de la lliteratura escrita n’asturianu, mesmo n’Asturies que nel exiliu; y una revisión del papel de l’asociación Amigos del Bable, fundada nel 1969 y pieza clave pa entender l’apaición nel 1974 del asturianismu modernu que supón Conceyu Bable. Una conferencia que'l doctor n'Humanidaes yá punxo en Xixón y qu'esta selmana diba llevar a Uviéu, al Manglar, eventu que tuvo qu'anulase por cuenta les midíes pola pandemia de COVID-19, pero qu'agora tolos uvieínos y persones con accesu a Internet van poder siguir gracies a una emisión en llinia entama pol Llar La Llegra.

Va ser a les 20.30 hores, depués del #FormientuEnCasaFest (19 hores, conciertu de María Llatores) y del aplausu vecinal a tolos trabayadores sanitarios y d'otres munches estayes pol so llabor contra'l coronavirus (20 hores), na canal de Youtube d'esti espaciu. D'esta forma La Llegra abre una serie d'actividaes en llinia que va programar nos díes próximos mientres siga l'estáu d'alarma.

Na semeya, Galán, a la derecha, xunto con Amadéu Benavente na conferencia que punxo en febreru sobre esta mesma temática en Xixón dientro del ciclu de charres sobre cultura asturiana qu'entama Ástura en collaboración col Atenéu Obreru de Xixón.

Contador Estadistiques