La Llegra denuncia ataques de calter neonazi a la so sede

Toos ellos produxéronse de madrugada. El vienres ta convocada una concentración de refugu a estos actos frente al llar uviedín.

La Llegra vien sufriendo dellos ataques dende va tiempu, que nun pasaben de pintaes na fachada, la colocación de pegatines con mensaxes xenófobos o l'unvíu de cartes. Sicasí, na madrugada d'esti llunes los responsables d'estos actos dieron un pasu más y al aborrone de los murales esternos con símbolos nazis y otros de conteníu machista sumaron la frayadura de cristales del centru social, lo que lleva al Llar La Llegra a "asoleyar públicamente los fechos asocedíos" nesti tiempu.

D'igual forma, nun comunicáu divulgáu peles redes sociales, esponen de manera cronolóxica tolos ataques sufríos nel añu últimu, sumando un total de cinco dende'l 10 d'avientu del 2015. "Como bien sabemos, la problemática nazi-facista n’Asturies ta presente periódicamente debío a aiciones asemeyaes, nun siendo La Llegra un casu aislláu dientro de los espacios autoxestionaos del nuesu país, con pintaes y dalguna agresión física en distintos conceyos. Pero esto, y pesie a la más qu'evidente dexadez –por nun dicir complicidá– institucional, nin enxamás evitó que sigamos alantre col nuesu proyeutu soberanista asturianu, coles nueses actividaes de formación, ociu y alderique, coles nueses idees y les de los coleutivos que s'averen al Llar, y cola nuesa irrenunciable concienciación y llucha escontra’l machismu, el facismu, el racismu, la xenofobia, la lgtbfobia…, y cualquier otra forma d’opresión; y asina siguirá siendo agora y siempres", apunten dende La Llegra.

"P’amosar el nuesu refugu non yá namái a estos fechos, sinón principalmente a les fediondes idees nes que s’amparen", el llar uviedín convoca pa esti vienres una concentración frente a la so sede. Va ser de magar les 19 hores.