La Llegra acueye un conceyu pa dar continuidá a la iniciativa #LluchandoPolaSoberanía

Les movilizaciones de mayu lleven a La Llegra a convocar un conceyu abiertu pa dar continuidá a la iniciativa #LluchandoPolaSoberanía. La primer cita ye'l Día del Trabayador.

L'ésitu de los bloques soberanistes mientres l'añu pasáu, que tuvo como fecha más destacada'l 8 setiembre, lleva a La Llegra a buscar una repetición de la esperiencia. Amás de nel Día de la Nación Asturiana, acudióse de manera conxunta a la manifestación del 1 de mayu en Xixón, el Día de les Lletres Asturianes, el 25 de mayu, la manifestación antitaurina y les distintes movilizaciones de les Asamblees de Trabayadores en Llucha. "Persones y organizaciones del ámbitu de la izquierda soberanista asturiana garraron la campaña #LluchandoPolaSoberanía como manera de visibilizar les reivindicaciones asturianes nestes manifestaciones, algamando una bona montonera de participantes y siendo de los cortexos más coloríos ya importantes neses movilizaciones", recuerden dende La Llegra, qu'acueye esta tarde nel so llar el primer conceyu abiertu pa organizase de cara a mayu. Va ser a les 19.30 hores y ta convidada tola ciudadanía a participar.