La Llegra algama en 24 hores cuasi la metá de les perres necesaries p’arreglar el so llocal nuevu

Asturies responde al llamáu de La Llegra pa facer realidá un espaciu nuevu de reunión de la izquierda soberanistra tres el desallugu del CSOA La Madreña. Nes primeres 24 hores de campaña de cuestación popular pela rede algamóse cuasi la metá de les perres necesaries pal arreglu del llocal, trabayos tasaos en 3.000 euros.

A la hora de redautar esta noticia, 25 hores depués de l’apertura del procesu na ferramienta Verkami, recaudáronse 1.380 euros. Toes estes perres dedicáranse pa facer obra nel llocal arrendáu na cai Postigu Baxu (númberu 40) d'Uviéu col oxetivu de convertilu “nun espaciu autoxestionáu pa siguir coles dinámiques de trabayu colectivu nes que se venía afondando dende febreru del 2014”. Asina, La Llegra pretende continuar siendo “un puntu d’alcuentru ente persones y sensibilidaes de la izquierda soberanista asturiana”, ensin zarrar la puerta a otros movimientos sociales y culturales.

Les persones que quieran collaborar con La Llegra pueden facelo al traviés de Verkami según les sos posibilidaes. Asina, úfrese la posibilidá d’aportar 10, 15, 20, 25, 35, 50, 100, 250 y 300 euros, dando como recompensa packs diferentes que van dende un menú del día pa dos persones, al regalu d’una asturiana o una cesta de productos de consumu xustu. La intención de los miembros de La Llegra ye inaugurar el llocal enantes de fin d’añu.