‘La llamada de Cthulhu y otres hestories’ permite lleer per primer vez a Lovecraft n'asturianu

Radagast, editorial que ta acabante de cumplir cuatro años de vida, va poner la selmana qu’entra a la venta’l so títulu últimu. Ye la ‘La llamada de Cthulhu y otres hestories’, la primer oportunidá de lleer a Howard Phillips Lovecraft en llingua asturiana, con nueve rellatos del escritor estauxunidense tornaos por Adrián Carbayales.

‘The Call of Cthulhu’ ye’l que rescampla nel títulu, pero’l llector tamién va atopar ‘Color Out of Space’, traducíu como ‘El color de fuera l’espaciu’, o ‘History of the Necronomicon’, la ‘Historia del Necronomicón’. “‘La llamada de Cthulhu y otres hestories’ trai a la vida’l mundu d’horror cósmicu y lo sobrenatural que carauteriza la obra de H.P. Lovecraft”, apunten dende Radagast, que se refieren al autor –que nun rellatu suyu del 1929 entituláu 'The Mound' tien un personaxe asturianu y fai referencia al "bable"– como “ún de los escritores más influyentes nel xéneru del horror”.

“Conocíu pol so estilu distintivu y les sos narratives enigmátiques, cobra nueva vida nesta edición n’asturianu. Los fans de la lliteratura de terror van tener la oportunidá d’esplorar los rellatos más inquietantes de Lovecraft nuna llingua na qu’entá nun s’escribieren pallabres como ‘cthulhu r'lyeh wgah'nagl’”, añaden dende la editorial. Carbayales, qu’enantes tornara a Robert E. Howard nel títulu ‘Conan el Bárabaru’, “trabayó a conciencia pa caltener la esencia y el misteriu de les hestories orixinales al empar que les adautó a la riqueza léxica y llingüística del asturianu”, rescamplen.

“Yera una falta tremenda que nun tuviéremos n'asturianu a ún de los autores más importantes del sieglu XX”, declaró’l traductor sobre esti proyeutu “que nun cuenta con nengún tipu de sovención o ayuda pública”, espresa la editorial. ‘La llamada de Cthulhu y otres hestories’ va tar disponible nes llibreríes la selmana qu’entra, anque yá se pue mercar en preventa na web de Radagast por 18 euros ensin gastos d’unvíu.