La izquierda xixonesa esixe midíes contra los cánticos racistes d'El Molinón

Xixón Sí Puede y Izquierda Xunida (IX) de Xixón reaicionaron énte la situación vivida'l domingu n'El Molinón, cuando l'árbitru Carlos Clos Gómez paró'l xuegu por mor de los soníos racistes del Fondu Mozu contra Iñaki Williams. Esixen midíes pa evitar estes situaciones que nun son nueves nel campu xixonés.

El fechu asocedió nel minutu 22, cuando una minoría de los siguidores asitiaos nel Fondu Mozu d'El Molinón emitió'l soníu carauterísticu del monu de manera despeutiva col xugador de color del Athletic Club tres una llance del xuegu. La situación nun-y pasó desapercibida al colexáu y, pese que la potencia del soníu foi menor qu'en partíos anteriores del Sporting onde se repitió esta mesma situación, l'aragonés decidió parar el xuegu p'avisar a Mario Cotelo, delegáu del Sporting, pa que se diera l'anunciu por megafonía de que nun diba permitir tales actitúes.

Esta decisión acertada del árbitru provocó que dalgo, por desgracia, común nun sector del públicu onde s'asitien los ultres del Sporting, tuviera una repercusión enorme a nivel estatal y, inclusive, n'otros países. Asina, tanto'l club roxiblancu como Xixón quedaron emporcaos por una minoría racista avezada a sacar simboloxía d'ultraderecha tanto fuera como dientro d'El Molinón con total impunidá.

Xixón Sí Puede va llevar a Plenu esti fechu

Esta situación llevó a Xixón Sí Puede a asoleyar un comunicáu na qu'anuncia que promoverá una declaración institucional nel Plenu contra los cánticos racistes n'El Molinón. "Entendemos que tales actitúes son intolerables en cualquier circunstancia, pero sobre manera cuando falamos d'una entidá como'l Sporting de Xixón, que ta mui venceyada cola ciudá y con una estrecha collaboración institucional col nuesu Ayuntamientu", afirma.

La candidara de xunidá popular considera "que tal declaración tien que ser una muestra contundente del refugu de la ciudadanía de Xixón coles actitúes racistes y xenófobes", al empar que destaca que "actitúes condescendientes con esti tipu d'actos, o que minimicen la so importancia, promueven un peligrosu caldu de cultivu onde los grupos racistes y xenófobos sienten qu'actúen con impunidá, lo que mancha de forma nidia la imaxe de Xixón, una ciudá abierta y d'acoyida".

IX pide la identificación de los responsables

Izquierda Xunida de Xixón tampoco nun quixo dexar pasar esti asuntu y esixe la identificación de los responsables de los soníos racistes y que s'impida la so entrada n'El Molinón, amás de treslladar dende'l Conceyu, tanto a Williams como al Athletic Club, disculpes pol fechu, "dexando patente que Xixón refuga'l racismu y la xenofobia en toles sos formes". Al respeuto, recuerda que'l campu onde xuega'l Sporting ye municipal, polo que "l'Ayuntamientu ha de tomar un papel activu énte la gravedá de los fechos, p'ayudar a atayar dafechu la proliferación d'actitúes qu'atenten contra los valores de la nuesa ciudá y la so ciudadanía, y del deporte en xeneral, pero que se repitieron con frecuencia".

Videu contra'l racismu del Sporting

La respuesta del Sporting énte esta situación foi la espublización d'un videu en YouTube y na so páxina web onde'l francés internacional con Martinica Babin, el croata Čop, el camerunés Ndi, el qatarín Afif y el francoarxelín Rachid, amás de Cuéllar, amosaba la so disconformidá col racismu. El club xixonés será sancionáu pol fechu vivíu nel partíu contra l'Athletic con una multa económica, ensin descartase el zarru por un partíu del Fondu Mozu d'El Molinón.