La izquierda abertzale asegura que nun va boicotiar el pasu de la Vuelta a España per Euskadi

La Vuelta va pasar per territoriu vascu esti vienres per primer vez en 33 años, anque nesta ocasión la izquierda abertzale asegura que nun va boicotiar la llegada de los ciclistes a Euskadi. Bilbo y Gasteiz van ser finales d’etapa.
 
EA, Alternatiba, Izquierda Abertzale y Aralar foron les formaciones que señalaron que, “en nengún casu”, van boicotiar el pasu de la Vuelta Ciclista a España per Euskadi, sinón que van actuar “con responsabilidá y respetu” pa reivindicar que “Euskal Herria ye una nación” y amosar el so refugu “a les imposiciones”. Nuna comparecencia güei énte la prensa, los representates d’estos partíos lleeeron un comunicáu, n'eusquera y castellanu, nel que señalaron que la decisión de trayer La Vuelta a les carreteres vasques “inscríbese na estratexa diseñada pol PP y el PSE de reafirmar qu'Euskal Herria forma parte d'España”. Al so entender, “nun ye más qu'otra decisión política, esta vez utilizando'l deporte, d'imponer al nuesu pueblu nun procesu d'españolización”.
 
La Vuelta “nun va ser bien recibida ente nosotros”, continuaron, pa depués denunciar que “presionar a la identidá vasca y reforzar tolo español ta tornando nuna obsesión pa PP y PSE”. Según afirmaron, ye una estratexa “que vien de lloñe, pero que se reforzó dende que llegaron al Gobiernu vascu”. N'alvirtiendo que PP y PSE “van utilizar la mesma estratexa con otros deportes”, criticaron que populares y socialistes “van dicir entós que nun hai qu'entemecer política y deporte” y entrugáronse “que ye lo que tán faciendo ellos ensin nenguna vergoña”. Sicasí, aseguraron qu'al pasu de la Vuelta a España van actuar “con responsabilidá y respetu”, pero, al empar, reivindicando que tán a favor del ciclismu, “en contra d'imposiciones y qu'Euskal Herria ye una nación”.
 
Estes formaciones convocaron concentraciones xunto con otres organizaciones sociales contra’l pasu de La Vuelta per Euskadi el vienres, a les 14 hores, nel Alto de las Muñecas, na frontera de Cantabria con Bizkaia, que va repitise a les 16 hores na meta de Bilbo, asina como'l sábadu, a les 11 hores na salida de la capital bizkaitarra, y a les 16 hores na meta de Gasteiz.