La IV Escuela Pensamientu Feminista d'AMA: "Feminismu pa tol mundu frente a la fola reaicionaria"

Va celebrase estos díes en Xixón con ponentes internacionales como la italiana Silvia Federici o l'arxentina Rita Segato.

"Xixón será el referente n'España de les que queremos avanzar en derechos y llibertaes", rescampla l'Asamblea Moza d'Asturies (AMA). Esti coleutivu entama dende güei hasta'l domingu la IV Escuela Pensamientu Feminista, alcuentru que crez en conteníos y participación, y presenta l'ampliu programa n'asturianu y castellanu.

El chigre sociocultural Les Cigarreres, onde s'abren a les 19 hores les actividaes cola presentación del llibru 'Las degeneradas trans acaban con la familia', d'Ira Hybris, coordinadora del llibru, militante transfeminista y pensadora comunista queer, que va conducir Sonia Carbajal, va acoyer la mayor parte de les mesmes. Asina, la xornada de mañana y del domingu va desendolcase ellí, tresllandándose la del sábadu al Muséu del Pueblu d'Asturies, onde va haber tamién una xinta popular, una actuación, a les 22.30 hores, d'Herbamora, y sesiones de Les Greques y Technoguajas.

El programa confórmenlu 7 meses y 28 ponentes, ente los que tán la filósofa y ex diputada nel Congresu, Clara Serra; la secretaria xeneral del sindicatu de trabayadores sexuales d'Arxentina, Georgina Orellano; l'escritor Bob Pop; la ex conceyala de Feminismos y LGTBIQ del Ajuntament de Barcelona, Laura Pérez; o la referente ecoloxista Yayo Herrero. Na Escuela Pensamientu Feminista trataránse temes d'actual relevancia como les estratexes necesaries pa ganar a la derecha y la estrema derecha, l'aición sindical feminista frente a la precarización de la vida, el cambiu climático, los derechos de les prostitutes o la feminización de la política.

Amás, esta escuela, d'accesu llibre –van retresmitise les diferentes intervenciones per redes sociales–, reivindícase "como un espaciu d'alcuentru y de diálogu, de defensa de la pluralidá del feminismu como daqué arriquecedor", y defende "un feminismu que lluche polos derechos de toes y afite alliances col movimientu LGTBI". "Feminismu pa tol mundu frente a la fola reaicionaria", abanderen.

La entrada de la ultraderecha nel gobiernu de Xixón

Dende AMA consideren "especialmente importante" esta edición "pol contestu que vive la ciudá llueu de les eleiciones conceyiles con un gobiernu llocal de Foro-PP-VOX, nel que la ultraderecha tien competencias en polítiques d'igualdá y culturales gracies a Carmen Moriyón y Foro Asturias. Con esti pauto de gobiernu evidénciase que pa l'actual alcaldesa los derechos de les muyeres y les persones LGTBI son prescindibles y una moneda de cambiu p'algamar gobiernos.

Tamién faen referencia a la otra escuela feminista que se celebró va poco en Xixón, la Rosario de Acuña, "inaugurada pol gobiernu de retrocesu de Foro-PP-VOX y Amelia Varcárcel, que mostró públicamente'l so sofitu a Feijóo va malpenes unes selmanes. Por too ello consideramos imprescindible la celebración d'esta escuela, más necesaria que nunca".