La ‘invención’ de la Selmana Santa n’Uviéu

¿Sabíes que les procesiones (resucitaes nel franquismu) dexaron de salir en 1968 al nun haber interés popular? Contámoste cómo se 'recupera' la Selmana Santa n'Uviéu copiando de la de Sevilla.

“Especial procesión de La Madrugá. 'Conexión Asturias' retransmite en directo la procesión de 'La Madrugá' de la Cofradía de los Estudiantes de Oviedo. Siente la Semana Santa de Asturias en TPA”, anunciaba l’añu pasáu l’ente públicu de televisión pa la nueche de Xueves Santu. Un direuto que nun ta na parrilla de programación de mañana magar que vien emitiéndolu dende’l 2017.

Pero, ¿qué ye eso de ‘La Madrugá’? Llamen asina a la procesión del Xesús de la Sentencia de la Hermandad de los Estudiantes de Oviedo, que la propia RTPA presentaba esi primer añu afirmando que “hereda la tradición sevillana y es la única del norte de España con costaleros que llegan a ponerse de rodillas para que el paso cruce por determinadas zonas de la ciudad”.

Esto ye, una copia de ‘La Madrugá’, la salida escalonada de distintes cofradíes per Sevilla colos sos pasos a lo llargo de tola madrugada del Vienres Santu con miles de persones nes cais.

Les procesiones dexaron de facese a lo primero del sieglu XX y recuperáronse nel franquismu

La Hermandad de los Estudiantes de Oviedo, que procesionó como hermandá constituyida per primer vez nel 2008, lleva’l Xesús de la Sentencia dende la parroquia de San Francisco Javier, en La Tenderina, hasta la capiella del Edificiu Históricu de la Universidá d’Uviéu’l llunes na nomada ‘Procesión del Prendimiento’, d’onde sal en Vienres Santu pa percorrer per cuatro hores el centru d’Uviéu.

La tradición reinvéntase agora copiando lliteralmente la Selmana Santa andaluza

La Selmana Santa uvieína desapaeció a lo primero del sieglu XX llueu d’años de declive y nel franquismu, al contrario que na mayoría de llugares, nun acaba de revitalizase magar los esfuercios de les autoridaes. Asina, depués d'unos años de reactivación tres de la Guerra Civil, en 1968 sal la última procesión.

Nun ye hasta 1995, cola refundación de Hermandad y Cofradía de Nuestro Padre Jesús Nazareno, cuando tornen a celebrase procesiones n’Uviéu.

Una tradición cristiana que nos últimos años quier potenciase non como se facía nel pasáu, sinón copiando la d’otros llugares, en concreto l’andaluza, de la mano de la Hermandad de los Estudiantes de Oviedo.

Ente los años 1968 y 1995 nun hubo procesiones n'Uviéu

El blogue ‘Costaleros de Oviedo’, nuna entrada del 2012 que presenta la 'Historia de la Hermandad y Cofradía de los Estudiantes', indica que “hasta llegar a esti importantísimu día –la fundación– trescurrieron munchos años de trabayu, ilusión y esfuerciu pa consiguir que’l suañu de fundar esta Hermandad, siguiendo los cánones sevillanos, fora una realidá”.

Pa ello los sos promotores acudiríen al I Congreso de Capacitación para la Técnica del Costal de Sevilla nel 2005 y “a cuasi tolos congresos y cursos celebraos nel sur d’España (delles veces na capital andaluza, Huelva, etc.), amás d’asistir de manera asidua a ensayos na ciudá de Sevilla”.

Los costaleros nun tienen tradición n'Asturies y siguen "los cánones sevillanos"

Unos viaxes de formación que se faen “por mor de que n’Uviéu nun esiste tradición, y nun hai referencia nenguna cercana d’estes costumes relixoses, tan desconocíes nun principiu na nuesa rexón, y que susciten reticencia per parte de dalgunes persones”.

Ye nel 2010 cuando afiten ‘La Madrugá’ con un pasu nuevu fechu en Torredonjimeno, copiando asina hasta’l nome sevillanu. Una tradición, la de los costaleros, non asturiana que ye la que más se ta potenciando agora dende les instituciones como referente de la Selmana Santa uvieína.