La "infrarrepresentación política que sufre Asturies" lleva a Aína a pidir consensos pa nun perder más escaños

De 10 diputaos nes primeres eleiciones democrátiques, nel 1979, a los 7 que se van escoyer esti domingu, 23-X. La baxada de población n’Asturies provocó la perda d’estos 3 escaños y llevó a Aína a facer un análisis nel que denuncia la “infrarrepresentación política que sufre Asturies por ser una comunidá autónoma uniprovincial” y a demandar consesos políticos pa reclamar un repartu “xustu”.

Ye un riesgu real qu’Asturies pase a contar nun futuru con 6 representanes nel Congresu de siguir la mesma dinámica demográfica y, aprovechando la cercanía de la cita eleutoral, Aína ta acabante de facer un análisis de la representación política asturiana que va surdir d’ésta, na que deteuta “una preocupante perda de pesu políticu que va dende l’entamu del actual periodu democráticu”. Apunta qu’otres autonomíes “terminen unviando’l doble, triple o casi cuádruple númberu de diputaos y diputaes al Congresu, nun teniendo esti repartu d’escaños correlación nenguna col pesu demográficu d’eses comunidaes autónomes pluriprovinciales respecto de l’asturiana” y afirma que, cola población actual, si Asturies tuviere trés circunscripciones. como asocede nes Nacionales. “la representación podría tar ente los 10 y 12 congresistes”.

Por exemplu, anguaño Aragón, con trés provincies, tien 13 representantes, cuasi’l doble qu’Asturies, “a pesar de que cuenta con un 30 por cientu más de población (1,3 millones frente al millón que tien Asturies). Pela so parte, Castilla-La Mancha, con cinco provincies y el doble de población, tien 21 escaños, y Castilla y Lleón, con nueve y poco más del doble de ciudadanos, 31.

Doble castigu

“Col sistema de repartu actual Asturies sal doblemente castigada, yá que, amás de sufrir la crisis demográfica en primera persona con toles consecuencies macro y microeconómiques qu’ello conlleva, sufre tamién un castigu perdiendo pesu políticu nes instituciones nes que se deciden, ente otres coses, cómo afrontar esa crisis conómica y demográfica o qué inversiones nel territoriu se faen”, denuncia Aína, que demanda a los partíos consensu políticu pa que toles diputaes y diputaos del país a “defender nel Congresu los intereses de les asturianes y reclamar un repartu d'escaños xustu qu’evite la infrarrepresentación y quegarantice’l pesu políticu que-y corresponde a esti territoriu nel marcu estatal”.

En definitiva, “asegurar qu’Asturies caltenga la so representación actual, nun pudiendo perder nengún representante más y afitando’l númberu actual como una cuota de poder territorial mínima independiente de la continua baxada de población”.