La infantil, la gran escaecida de la escolarización del asturianu

L'entamu del cursu nes escueles y institutos asturianos ta a muncha distancia de ser normal no rellacionao cola llingua asturiana. Según denunciaron fontes del sindicatu Suatea, en dellos institutos entovía falta por cubrir la plaza de llingua asturiana, siendo la situación enforma grave nel casu del galegu-asturianu, onde los IES de Tapia, A Veiga y Navia entovía nun tienen mayestru. Candás y Colombres son otres dos places onde entovía nun hai profesoráu. L'apaición de dos casos en que se-yos dio plaza a mayestrosque nun taben nel rexistru de capacitación d'asturianu tamién distorsionó l'entamu del cursu,anque de cualquier manera, al dicir de Xuan Castañón, del SUATEA, estos, con ser gordos, nun son los problemes más graves qu'afecten a la escolarización del asturianu nun cursu en que se rexistró una xuba del alumnáu que pidió asturianu, ello con tolos pilancos que suelen apaecer nel camín de la matriculación en llingua asturiana.

Al paecer del sindicalista, al marxe de que tolos años siguen dándose les mesmes situaciones de places que falten por cubrir y demás problemes alministrativos, la situación de la escolarización del asturianu nun sal alantre porque, ente otres cuases, l'alministración, y dacuando les direcciones de los centros, tan faciendo lo posible porque la xente nun matricule a los sos fíos n'asturianu. Ello taría faciéndose al travíes de diverses práctiques, como ye'l llanta-yos a los rapacinos asignatures alternatives obligatories o el nun facer grupu d'asturianu alegando que nun hai estudiantes abondos que lo pidan, cuando en realidá si que los hai en bien de casos.

Estes situaciones, qu'afecten en mayor o menormidida a los centros de primaria y secundaria, son enforma graves n'educación infantil , onde la propia Conseyería d'Educación taría apretándo-yos a los centros pa que nun pidan plaza d'asturianu, lo que'l sindicalista interpreta como un intentu de mete-y tixera al gastu nun momentu en que la Conseyería pasa per una crisis económica mui grande que vien de la falta de financiación. El resultáu d'esta dinámica ye que la mayor parte de los centros d'infantil, onde s'escolaricen los rapacinos d'ente 3 y 5 años, nun dan asturianu, colo qu'una etapa básica na formación de los neños queda ensin presencia de la llingua ente les enseñances recibíes, lo que fai que depués seya más difícil qu'esos mesmos rapacinos al llegar a la primaria se metan per ello.