La incineradora de Serín sigue atropando manifestaciones de refuga

El xerente de Cogersa, Santiago Fernández, va aconceyar esti día 6 de febreru col alcalde de Corvera Luis Belarmino Moro y con representantes de les asociaciones de vecinos p'apurrí-yos más información sobre la incineradora de Serín, que ta previsto que se llicite esti branu pa entamar a construyise nel 2008 y que s'asitia na redolada d'esti conceyu.

L'anuncia de la reunión vien dempués de que delles asociaciones denunciaren que nun les convidaren al viaxe organizáu por Cogersa a visitar les incineradores de Viena y de París. Nel mesmu conceyu de Corvera la organización política Andecha Astur emitió tamién un comunicáu de prensa pidiéndo-y al conceyu que fixere una declaración plenaria refugando la creación de la incineradora. El partíu nacionalista diz na so argumentación que cola incineradora va castigase mediuambientalmente una zona que yá lo ta pola presencia de Dupont, Asturiana de Zinc, Aceralia o Fertiberia ente otres. Ello al empar qu'Andecha ve contradictorio y hasta demagogo empobinar recursos a Corvera dende la Mancomunidá Túristica de la Comarca d'Avilés cuando los planes industriales van acabar cuasimente con tolos atractivos pa los visitantes al conceyu.

Otramiente, Izquierda Asturiana (IAS) emitió un comunicáu en que denuncia la postura de "doble raseru" que-y abulta que ta gastando la coalición Izquierda Xunida, sobremanera en Xixón, nel asuntu de la incineradora. El portavoz en Xixón d'esta formación, Pablo Rodríguez, declaró que vía "con plasmu" como "un partíu que forma parte del equipu de gobiernu del conceyu pretende liderar una plataforma contra ún de los proyectos que más sofita'l mesmu gobiernu como ye'l de la planta incineradora". El portavoz d'IAS calificó esta actitú de "dir colos de la feria pa volver colos del mercáu" y condenó qu'IX permita que'l PSOE faiga tolos sos proyectos más alloriantes ensin facer otro que "mostrar la so indignación pública pa dempués asumir na realidá'l programa socialista".