La incineradora de COGERSA sigue nel puntu de mira

Izquierda Xunida, socia de gobiernu n'Asturies y nel Ayuntamientu de Xixón, onde s'asitiaría'l fornu, tamién se marcó esta selmana en contra del proyectu pa facer la incineradora de basura en Serín, lo mesmo que fexo Izquierda Asturiana (IAS).

Dempués de conocese la oposición de los grupos ecoloxistes, que yá llamaron l'atención a primeros d'esti branu sobre'l proyectu del ente de xestión de basures Cogersa pa facer en Serín un fornu pa incineración de basura con capacidá pa 450.000 tonelaes al añu, los partíos políticos van tamién afitando tamién les sos posiciones nel debate sobre esta instalación. Izquierda Xunida de Xixón, al traviés del so representante Jesús Montes Estrada, dio anuncia ayeri de que la coalición va entamar una campaña d'oposición radical énte'l fornu, del que tienen mieu que vaya valir pa quemar tolos residuos hospitalarios y peligrosos de Madrid p'arriba, una situación que fadría d'Asturies el basureru del norte d'España. Montes Estrada pidió que se respeten los plazos y que nun se quiera acelerar la entrada en serviciu d'un modelu de xestión de residuos que va contra los mandaos de la UE y que nin siquiera ta debatíu, sobremanera en cuantes que COGERSA tien unes instalaciones válides hasta'l 2015.

Pela so parte, Izquierda Asturiana (IAS) echó tamién contra'l fornu de COGERSA, que calificó al traviés del so portavoz nacional Inaciu Llope, de "nueva páxina na
nefasta política ecolóxica del gobiernu asturianu". El portavoz d'Izquierda Asturiana sorrayó qu'amás del dañu mediuambiental, el fornu tien tamién una llectura negativa dende'l puntu de vista económicu, concueyando n'argumentación d'IX en cuantes que'l fornu "condena a Asturies a ser el vertederu de los residuos de gran parte d'España" una condena que pa IAS vien "ensin que se dea esplicación d'ello nin s'ufierten contrapartíes" lo que lleva a Llope a entrugase "por qué esti tipu d'instalaciones siempre se faen na nuestra tierra y por qué los nuestros responsables siempre s'ofrecen voluntarios pa ello" en referencia a proyectos como los ciclos de xeneración térmica que van doblar la producción enerxética d'Asturies, o al llavaderu d'oru de Balmonte, instalaciones y proyectos que faen pal responsable d'IAS qu'Asturies sía "el basureru de la riqueza ayeno"


Otramiente, la portavoz del Gobiernu Ana Rosa Migoya esplicó ayeri na rueda de prensa que se dio n'acabando la xunta del Conseyu de Gobiernu sobre l'asuntu de la incineradora que, en cualquier casu, el Gobiernu ha ser respetuosu cola autonomía del ente Cogersa, nel que tamién participen los conceyos, y remembró que la "valorización enerxética de los residuos" etiqueta cola que se noma oficialmente la incineradora, yera un asuntu aprobáu yá nel Plan de Futuru del Ente del 2003 por tolos partíos representaos, ente ellos IX.