La inauguración d’una esposición d’homenaxe a Escuela de Odio abre’l certame Llangréu Cultural

Dende esti martes y hasta’l 14 d’abril, Llangréu va acoyer una montonera d’actividaes baxo la etiqueta Llangréu Cultural. La esposición d’homenaxe a Escuela de Odio abre esti certame qu’inclúi un festival de cerveza artesano y conciertos de la banda llocal, Silvia Quesada, Nuberu, Dixebra o Riot Propaganda.

La inauguración de la esposición dedicada a Escuela de Odio va celebrase a les 19.30 hores na Pinocoteca’l Conceyu Llangréu Eduardo Úrculo, cola presencia de tolos músicos que pasaron pela banda de hardcore con una importante presencia en Llatinoamérica. Mañana la música va siguir siendo protagonista cola presentación del discu d’Adriana López, ganadora del I Sácame pola Pinta, que va tar apadrinada por Nuberu, Silvia Quesada y Alfredo González nun conciertu de baldre que va comenzar a les 19.30 hores nel Nuevu Teatru de La Felguera.

El xueves, a les 19 hores na Pinacoteca, va abrir les sos puertes la Feria de Discos, que va allargase hasta’l domingu n’horariu de 12 a 15 y de 18 a 23 hores, el vienres y el sábadu, y de 12 a 15 y de 18 a 21 hores, el domingu. Dientro d’esta actividá van entamase firmes de discos por parte de Trujas (vienres, 18.30), Grupo Beatriz (sábadu, 13), Dixebra (sábadu, 20.30) y Fernando Valle Roso (domingu, 13). Otra manera, el mesmu xueves, a les 20 hores, va proyeutase ‘Moonlight’, de Barry Jenkins, nel Teatru Nuevu de La Felguera.

Festival Internacional de Cerveza Artesano de Llangréu

El vienres, sábadu y domingu, dientro’l recintu la Pinacoteca, va celebrase una edición nueva del Festival Internacional de Cerveza Artesano de Llangréu, con 57 variedaes, charres y clases maestres alredor d’esta bébora y muncha música. Asina, l’Always Drinking Marching Band, El Tamar y Vaudí Groove Brasil van protagonizar la nueche del vienres, siendo la del sábadu pa Rabia Xabaz, Escuela de Odio, Dixebra y Riot Propaganda, el proyeutu que tien el so xerme na fusión de los castellanos Habeas Corpus y los valencianos Los Chikos del Maíz.

Mentes, el domingu va haber ‘sesión vermú’ con The Brassieres, Soldado Vasili y El Comité Eléctrico, y RadioActive Monkeys. Yá de tarde’l, turnu va ser pa La Bande.

Espectáculos teatrales

La selmana de Llangréu Cultura va allargase hasta’l 13 y el 14 d’abril con dos espectáculos teatrales. El xueves, a les 19.30 hores, la Xata la Rifa va poner l’espectáculu ‘La ola flotante’ nel Espaciu piragüismu Puente Lada, y el vienres, a les 20.15 hores, Atalaya Teatro va representar ‘Celestina. La tragicomedia’ nel Teatru Nuevu de La Felguera.