La imaxe artística de Cuadonga hasta l'añu 1850, nes charres del RIDEA pol centenariu

Va ponela'l profesor d'Historia del Arte de la Universidá d'Uviéu Javier González Santos.

'El alborear de la imagen de Covadonga (estampas, pinturas y modelos anteriores a 1850)' ye'l nome de la tercer ponencia del 'V Ciclu de Conferencies Centenariu Cuadonga: Reginaes Nostrae Montibus' qu'entama'l Real Institutu d'Estudios Asturianos (RIDEA), en collaboración col Cabildo del Real Sitio de Covadonga, dientro de les conmemoraciones venceyaes con Cuadonga nesti 2018: 1.300 años de los oríxenes del Reinu d'Asturies, un sieglu de la creación del Parque Nacional de la Montaña de Covadonga, anguaño de Picos de Europa, y el primer centenariu de la coronación canónica de la Santina. Ésta va comenzar mañana a les 19.30 hores nel salón d'actos de la sede de la institución, con entrada llibre.

Van completar esti ciclu les charres 'Religiosidad culta y piedad popular en el Real Sitio de Covadonga', de José Luis González Novalín (día 22); y 'La historia y Covadonga', de Isabel Torrente (27). Enantes, Francisco Javier García Conde faló de 'Covadonga: realidad y mito' y Tomás Emilio Díaz González de los 'Aspectos geobotánicos del Parque Nacional de los Picos de Europa'.