La II Xornada Añal d'Improvisación na Universidá d'Uviéu axuntó a alumnos asturianos y erasmus

El rector Ignacio Villaverde inauguró esti eventu qu'entama'l l'asociación cultural Alta-Voz.

Per segundu añu entamóse con ésitu la Xornada Añal Internacional d'Improvisación de la Universidá d'Uviéu, "una velada de gran provechu y entretenimientu, na que se punxo a prueba'l remangu y la creatividá de los estudiantes, al tiempu que se xeneró un clima mui agradable d'esfrute y retroalimentación ente unos y otros", apunten los organizadores. Esta cita, celebrada'l vienres pasáu nel ximnasiu de la Facultá de Formación del Profesoráu y Educación, contó amás con una importante participación d'estudiantes erasmus, "que se divirtieron muncho (lo mesmo que tolos presentes) y agradecieron la caldia acoyida de los estudiantes llocales que los convidaron a participar nel actu".

Esta actividá consiste nuna serie de xuegos d'improvisación teatral nos que los alumnos tienen qu'amosar les sos capacidaes artístiques y la so habilidá pa salir del pasu en situaciones inesperaes, con desenllaz frecuentemente cómicu, anque tamién se dieron improvisaciones d'otru tonu. "Esperemos qu'esta Xornada Añal d'Improvisación seya una señal d'un próximu surdimientu cultural na nuesa universidá, un surdimientu que va venir de la mano los estudiantes", apunten dende'l grupu Alta-voz, asociación cultural que rescampla la consolidación d'esta iniciativa al tiempu qu'agradecen l'asistencia a la inauguración de l'actividá de Villaverde y del decanu de la Facultá de Formación del Profesoráu, Celestino Rodríguez Pérez.