La II Carrera Familiar pol Asturianu va homenaxar a la familia Fonseca nel Pueblu d'Asturies

|
Cartelu V Día de la Reciella

El domingu, dientro del marcu del V Día de la Reciella, va tener llugar la II Entaína, carrera familiar y popular que tien como oxetivu celebrar la tresmisión interxeneracional del idioma. Nella va homenaxase a la familia Fonseca.

La primer edición de la Entaína tuvo llugar l’añu pasáu con un formatu de marcha d'un quilómetru, a la que se xunen nesta segunda edición trés categoríes pa neños y neñes de distintes edaes, con un llargor de 150, 250 y 400 metros. La carrera va dar comienzu a les 11.30 hores nel Muséu del Pueblu d’Asturies y el so percorríu va tener llugar dientro del propiu recintu museísticu.

La inscripción puede facese na web de l'asociación ‘Reciella. Families pol Asturianu’ y tien un costu de 3 euros para los mayores d'edá y de 2 euros pa neños y neñes. Una de les carauterístiques de la carrera, que tien calter festivu, ye qu'una familia tolos años se convierte en protagonista como exemplu de la tresmisión del asturianu d'unes xeneraciones a otres nel mesmu llar como garantía de futuru pal idioma.

D’esta forma, parte de los miembros de la familia escoyida cuerren con un testigu que se va pasando ente los miembros de la mesma, siendo los homenaxaos nesta ocasión la de Nacho Fonseca. El maestru y padre de los populares proyeutos musicales infantiles Seliquín y Xentiquina va dar el testigu simbólicu a la so fía Esther, que depués va facer lo propio cola so fía Manuela.

Contador Estadistiques