“La idea ye dir despacio, y si xuntamos 8 o 10 temes igual nos animamos a sacar discu”, apunta Chuchi d’Avientu

Depués de dos décades, Avientu asoleya cantar nuevu, ‘Camín de llibertá’, que vien acompañáu d’un videoclip. “La idea ye dir seliquín, y si xuntamos 8 o 10 temes igual nos animamos a sacar discu”, apunta’l baxista Chuchi Vázquez, qu’adelanta que la histórica banda de Riosa yá cuenta con cuatro temes compuestos.

Un conciertu en Noreña, el primer ‘Asturies nun escaez’ d’Andecha Mocedá, y otru en La Felguera con Llan de Cubel, allá pel añu 2000, foron les ocasiones últimes nes que’l públicu pudo ver a Avientu en direuto hasta’l 2014, cuando tamién nesi mesmu festival conmemorativu de la Revolución d’Ochobre del 34, organizáu yá por Darréu, tola formación orixinal celebraba’l venti aniversariu de la banda. Trés años depués repetiría en Riosa con motivu del Día d’Asturies xunto con bandes como Faen Versión, Nuberu, La Tarrancha, Ochobre y Skama la Rede.

“Al tar xente del grupu trabayando fuera tuvimos toos esos años paraos, pero que pudieran tornar a casa, xunío a los ensayos pa eses cites, animónos a siguir y sacar temes nuevos”, esplica Chuchi. Asina nació ‘Camín de llibertá’, que grabaron de manera casera “con un resultáu mui bonu”, al que decidieron acompañar d’un videoclip rodáu en Llumeres, Riosa y Morcín por SobrinoFilms qu’estrenaron esta mesma tarde.

“Yá tenemos cuatro cantares compuestos. La idea ye dir despaciu, mui seliquín y, si xuntamos 8 o 10 temes, igual nos animamos a sacar discu”, señala. “Y si hai un conciertu bonu, tocar, que nos presta”, añade.

Mesma formación

Con trés trabayos espublizaos, ‘Tírate abaxo’ (1995) –en cinta–, ‘¿Y agora qué...?’ (1996) y ‘Glayíos dende’l fondu’ (1999), amás de grabar el cantar ‘Estrelles ensin nome’ pal recopilatoriu ‘L’asturianu muévese’ (1997), del que tamién fixeron videoclip, Avientu sigue siendo un grupu mui nomáu. “Cuando vine a vivir a Xixón sorprendióme la cantidá de xente que nos conocía. Y llamónos l’atención ver a xente mozo cantando los nuesos temes nos conciertos últimos”, rellata Chuchi, qu’esplica que too ello ayudó a que la banda siguiera colos ensayos “cuando podemos xuntanos toos, que nun ye siempre fácil poles cuestiones de caún”.

La formación sigue siendo la mesma, cola novedá del avilesín Pablo Bango a la gaita: Chuchi (baxu), David Suárez (guitarra y voz), Xosé Lluis Álvarez (guitarra y voz) y Óscar Álvarez (batería). Una bona noticia, esta vuelta, pal rock en llingua asturiana.

Na semeya, la banda nun momentu de la grabación en Llumeres.