La hostelería va poder abrir esteriores y interiores hasta la 1 de la madrugada dende'l domingu

El Gobiernu anunció esti martes l’adaptación de les midíes cola llegada del fin del estáu d’alarma’l domingu. La ferramienta de l'alerta 4+ camuda les condiciones pa la entrada automática a esti nivel y va tener una precisión mayor, mentes que la hostelería va poder abrir esteriores y interiores hasta la 1 dende'l domingu, con 6 persones per mesa.

El presidente Adrián Barbón; el conseyeru de Salú, Pablo Ignacio Fernández Muñiz; y el direutor xeneral de Salú Públicu, Rafael Cofiño, espusieron les novedaes de la situación epidemiolóxica. La incidencia acumulada a 14 díes de 136 casos cada 100.000 habitantes, en tendencia descendente, y l’avance de la campaña de vacunación fai que “podamos suavizar les midíes, ensin nengún trunfalismu”, apuntó Barbón.

El vienres, momentu nel que finen les restricciones actuales, los chigres van poder abrir hasta la hora del toque de queda, les 23 hores, tamién interiores, cuando van poder acomodar 6 veceros, siempre coles barres pesllaes. Yá’l domingu van ver ampliáu’l so horariu hasta la 1 de la madrugada una vegada fináu l’estáu d’alarma, al igual qu’asocedía’l branu pasáu,

Tamién va haber ampliaciones d’aforu en dellos sectores, al 70 por cientu en comercioes de más de 300 metros cuadraos o al 50 por cientu en centros de mayores, van ampliase los grupos pa facer actividaes deportives o van flexibilizase les condiciones pa feriantes pal usu d’hinchables, ente otres midíes que se van dar a conocer.

Los cambios del 4+

La forma d’entrada al nivel d’alerta 4+ dende’l domingu va camudar, faciendo agora una distinción ente conceyos de más y menos de 10.000 habitantes. Les condiciones pa entrar los primeros son tener una incidencia acumulada a 14 díes superior a 325 y llevar 3 díes o más nel nivel 4 de los indicadores d’alerta del Ministeriu de Sanidá, descartándose agora los otros dos indicadores que se teníen en cuenta, esto ye la incidencia acumulada ente mayores de 65 años y la trazabilidá.

Mentes, pa los conceyos de menor población va facese una valoración individual “teniendo en cuenta la velocidá y tendencia del cambiu de los casos diagnosticaos nos últimos 7 y 14 díes, el númberu de casos absolutos, la trazabilidá y proporción de casos nuevos asociaos a biltos, y la esisetencia de puntos calientes”, esplicó Fernández Muñiz. Les restricciones n’entrambos casos pue facese a tol territoriu o a una zona concreta del mesmu, como pue ser una población o barriu.

“Lo que se fai ye una precisión mayor. Éntrase automáticamente, pero les midíes se deciden individualmente pa cada conceyu. Y ésa ye la gran diferencia”, matizó Barbón, qu’esplicó que los encargaos de facer esa precisión “va ser equipu téunicu d’epidemiólogos y espertos en salú pública que, colos datos na mano y el rigor que-yos carauteriza, fadrá esa propuesta”.

Na semeya, Fernández Muñiz, Barbón y Cofiño.