La Guía de Programes Educativos de Xixón ufre diez actividaes n’asturianu

Los centros educativos de Xixón pueden participar en diez talleres o actividaes entamaes pol Departamentu d’Educación de la Fundación Municipal de Cultura, Educación y Universidá Popular. Éstos tán empobinaos a alumnáu dende Infantil a Bachilleratu.

Les neñes y neños de tercer cursu d’Educación Infantil pueden beneficiase de ‘De la panoya al platu’, un taller de cocina, mentes que los de Primaria tienen la posibilidá de participar nel alcuentru coral ‘Cantar presta muncho’ o recibir nel so centru les esposiciones didáutiques ‘Qué cuentu tienes’. Específicamente pa los de primeru y segundu de Primaria ye ‘Danciando tol añu’, pa conocer bailles tradicionales, mentes que los de cuartu van poder facer una salida pedagóxica en formatu ‘gymkhana’ per La Rula, Cimavilla, el Campu Valdés y el Muru.

‘Xixónpolis. El xuegu pa mercar Xixón’ ta destináu a escolinos y escolines de quintu, una forma de asitiar los barrios y parroquies del conceyu, y los de sestu van poder averase al cómic de la mano de Ruma Barbero en ‘El cómic n’asturianu’. Pa Secundaria úfrense trés actividaes, ‘Sol nos pomares: les migraciones güei y ayeri’, pa los de primeru y segundu, y el XV ¡Saca la llingua! Alcuentros de la Mocedá cola Llingua, destináu a los cuatro cursos, amás del novedosu ‘Esto nun ye mui normal’, empobináu a recordar la memoria de Federico González-Fierro Botas y que va consistir nun concursu nel que cada centru educativu va proponer idees pa normalizar l’idioma.

Toles actividaes son de baldre pa los centros y cuenten con monitores, material didáuticu y tresporte. Pa formalizar la so participación en cualquiera de les mesmes, han de facer el trámite al traviés de la páxina web municipal enantes del día 29.